Ռուսաստանի, Ադրբեջանի եւ Հայաստանի նախագահների` Սոչիում մարտի 5-ին կայացած հանդիպումը դուռ է բացել Ղարաբաղի հարցով հետագա բանակցությունների համար: Այդ մասին հայտարարել է ԵԱՀԿ գործող նախագահ Աուդրոնյուս Աժուբալիսը Բաքվում Ադրբեջանի ԱԳ նախարարի հետ համատեղ ասուլիսում:
Աժուբալիսի խոսքով, այսօր գլխավորը բանակցությունների խոչընդոտների վերացումն է: «Լիտվայի նախագահության գերակայություններից է ղարաբաղյան հակամարտության կարգավորումը, եւ այդ հարցն էլ այսօր քննարկվել է Ադրբեջանի պաշտոնյաների հետ»,- ասել է նա եւ հավելել, որ այժմ ԵԱՀԿ բոլոր անդամ-երկրները պետք է բաց հայտնեն իրենց դիրքորոշումները: Աժուբալիսը կոչ է արել հակամարտության կողմերին հանել իրենց դիպուկահարներին ճակատային գծից, հաղորդում է Trend-ը:
Ինչպես ավելի վաղ հայտնել էր NEWS.am-ը, մարտի 5-ին Սոչիում տեղի է ունեցել Հայաստանի, Ռուսաստանի եւ Ադրբեջանի նախագահների եռակողմ հանդիպումը՝ Ռուսաստանի նախագահ Դմիտրի Մեդվեդեւի նախաձեռնությամբ։ Սա նախագահների՝ եռակողմ ձեւաչափով 8-րդ հանդիպումն է։
Նախագահները համատեղ հայտարարություն են ընդունել, որում պարտավորվել են ամենակարճ ժամկետում ավարտել ռազմագերիների փոխանակումը, ձգտել բոլոր վիճելի հարցերը լուծել խաղաղ միջոցներով եւ կրակի դադարեցման գծի երկայնքով կողմերի մասնակցությամբ անցկացնել հնարավոր միջադեպերի հետաքննություն` ԵԱՀԿ Մինսկի խմբի համանախագահների հովանու ներքո եւ ԵԱՀԿ գործող նախագահի հատուկ ներկայացուցչի աջակցությամբ:
Հայաստանի նախագահ Սերժ Սարգսյանը Սոչիի հանդիպումը հանգրվանային է գնահատել:
