Գարնանային հեղեղումների ժամանակ հնարավոր խնդիրների եւ դրանք կանխելու հետ կապված հարցեր են քննարկվել այսօր՝ մարտի 16-ին Հայաստանի փոխվարչապետ, տարածքային կառավարման նախարար Արմեն Գեւորգյանի մոտ: Քննարկմանը մասնակցել են շահագրգիռ գերատեսչությունների ղեկավարներ եւ մարզպետներ:
ՏԿՆ մամուլի ծառայությունից NEWS.am-ին հայտնում են, որ Գյուղատնտեսության նախարար Ս. Կարապետյանը տեղեկացրել է, որ Արարատի եւ Արմավիրի մարզերում արդեն սկսվել են Արաքս գետի վթարային արգելաթմբերի եւ ափապաշտպան պատնեշների վերակառուցման աշխատանքները, որոնք սահմանված ժամկետներում կավարտվեն:
Հայպետհիդրոմետի տնօրեն Լ. Վարդանյանը, ներկայացնելով եղանակային կանխատեսումները, նշել է, որ գետերի մակարդակն այս գարնանը նորմայից փոքր-ինչ բարձր կլինի, ջերմաստիճանի կտրուկ բարձրացումների դեպքում առանձին հատվածներում հնարավոր են լարված իրավիճակներ: Կանխատեսվում է, որ Ախուրյան, Ազատ, Ապարան ջրամբարները կունենան 100 տոկոս լցվածություն:
Խորհրդակցությանը քննարկվել է Արարատի եւ Արմավիրի մարզերում Արաքս գետի հունից ավազի արդյունահանման եւ ափապաշտպան կառույցների վերականգնման կարգի նախագիծը:
