Ձեռնարկությունների ինկուբատոր հիմնադրամը հրապարակել է «Հայաստանի տեղեկատվական տեխնոլոգիաների ոլորտ. ծրագրային ապահովում եւ ծառայություններ» հետազոտությունը, որից պարզ է դառնում, որ հիմնական ցուցանիշներում 2010թ.-ին նախորդ տարվա հետ համեմատ էական փոփոխություններ չեն գրանցվել:

Հիմնադրամի փորձագետ Սոնա Կոչկանյանը NEWS.am- Ինովացիայի թղթակցի հետ զրույցում ասաց, որ ՏՏ ոլորտի հիմնական ցուցնիշները հետեւյալն են. 2010 թ.  գործող ընկերությունների քանակը 197 է, որից 125-ը տեղական ընկերություններ են, իսկ 72-ը՝ արտասահմանյան ընկերությունների մասնաճյուղեր: 2008 թ. Հայաստանում գործող ընկերությունների թիվը 175 էր, որից 119-ը տեղական ընկերություններ էին, իսկ 56-ը՝ արտասահմանյան ընկերությունների մասնաճյուղեր:

Ոլորտի ընդհանուր հասույթը 2010թ.-ին կազմել է 148,8 մլն դոլար, որից 57,8 մլն դոլարը տեղական ընկերություններինն է, իսկ 91,1 մլն դոլարը՝ արտասահմանյան: Համեմատության համար ասենք, որ 2008թ.-ին ընդհանուր ոլորտի հասույթը կազմել է 111,3 մլն դոլար: Աճը 2008թ. համեմատ կազմում է 34%:

Ոլորտի արտադրողականությունը ընդհանուր ցուցանիշը (միջին շրջանառությունը մեկ տեխնիկական աշխատակցի հաշվարկով, առանց ինտերնետ ծառայություն մատուցող ընկերությունների) 2010 թ.-ին կազմել է 31,500 դոլար։ Տեղական ընկերությունների արտադրողականությունը 29,200 դոլար է, արտասահմանյաններինը՝ 33,700 դոլար։  2008թ.-ին ոլորտի արտադրողականության ընդհանուր ցուցանիշը եղել է 26,100 դոլար:

2010թ.-ին ոլորտում զբաղվածների ընդհանուր թիվը կազմում է 4,960, որից տեխնիկական մասնագետներ` 4,110, իսկ ղեկավար եւ վարչական անձնակազմը` 850 հոգի: Զբաղվածների 43%-ը տեղական ընկերություններում, իսկ 57%-ը արտասահմանյան մասնաճյուղերում:

2008թ-ի հետ համեմատ ոլորտում զբաղվածների ընդհանուր թիվը աճել է ընդհամենը 1%-ով: Նշենք, որ 2008թ.-ին ոլորտում զբաղվածների ընդհանուր թիվը 4.890 էր: 

Նշենք, որ հետազոտությունը իրականացվել է ԱՄՆ Միջազգային զարգացման գործակալության CAPS ծրագրի, Էկոնոմիկայի նախարարության եւ այլ կառույցների աջակցությամբ։