Երբ փետրվարին, միջազգային գներով պայմանավորված ցորենի գներն սկսեցին աճել, մասնագետները կանխատեսում էին, որ գների լուրջ անկում տեղի ունենա մարտի սկզբին՝ կապված հարավային կիսագնդի որոշ երկրներում բերքահավաքի մեկնարկով:
Ու թեեւ փետրվարի համեմատ ցորենի միջազգային գները նվազել են 15-20 տոկոսով, սակայն Հայաստանում ցորենի ու ալյուրի գնանկում չի նկատվում: Այսօր Գյումրիի տարբեր վաճառակետերում բարձր կարգի 50 կգ-անոց պարկով ալյուրը վաճառվում է միջինը 12 հազար դրամով: Սրանով պայմանավորված չեն իջնում նաեւ մակարոնեղենի, հացամթերքի գները: Հացի փռերում էլ հավաստում են, որ ալյուրը ձեռք են բերում այն գներով, ինչ փետրվարին էր, սրանով պայմանավորված էլ հացը շարունակում են վաճառել 120-140 դրամով:
«Երբ միջազգային շուկայում արձանագրվում է գնաճ, դրան հայաստանյան շուկան արձանագանքում է ժամեր անց, իսկ ահա գնանկմանը մեր շուկան 2-3 ամիս ուշ է արձագանքում»,-NEWS.am-ի թղթակցի հետ զրույցում նշել է տնտեսագետ Արտակ Մանուկյանը, ով դա բացատրում է հայաստանյան շուկայի մենաշնորհային բնույթով: