ԵԱՀԿ Մինսկի խմբի համանախագահները հանդես են եկել հայտարարությամբ, ամփոփելով տարածաշրջան կատարած իրենց այցելությունը:
Հայտարարության մեջ, մասնավորապես, նշվում է, որ համանախագահները մարտի 15-17-ին այցելել են Բաքու, Երեւան եւ Լեռնային Ղարաբաղ: Բաքվում նրանք հանդիպել են Ադրբեջանի նախագահ Իլհամ Ալիեւի եւ ԱԳ նախարար Էլմար Մամեդյարովի, Երեւանում՝ ՀՀ նախագահ Սերժ Սարգսյանի եւ ԱԳ նախարար Էդվարդ Նալբանդյանի հետ: Լեռնային Ղարաբաղում նրանք քննարկումներ են ունեցել տեղի իշխանությունների հետ:
Հանդիպումների ընթացքում համանախագահները կողմերին կոչ են արել օգտվել Սոչիում երկու երկրների նախագահների հանդիպման դրական ազդակներից, կենտրոնացնել ուշադրությունը առաջնահերթ հարցերի վրա, որպեսզի հնարավոր լինի համաձայնության հասնել հակամարտության հիմնարր սկզբունքների հարցում:
Նրանք նաեւ կողմերի հետ քննարկել են կոնկրետ միջոցառումներ, որոնք ուղղված են Սոչիում ընդունած համատեղ հայտարարության պարտավորությունների կատարմանը: Դրանք վերաբերում են 1994-ին ձեռք բերված հրադադարի ռեժիմի խախտումների վերաբերյալ հետաքննություն անցկացնելուն:
Համանախագահներն ընդգծել են, որ Սոչիի հանդիպումից առաջ եւ հետո շփման գծում վերջին միջադեպերը ցույց տվեցին, որ շտապ անհրաժեշտ է նման մեխանիզմ ստեղծել եւ կողմերին կոչ են արել պահպանել հրադադարի ռեժիմը: Նրանք հիշեցրել են շփման գծից դիպուկահարներին հետ քաշելու գոյություն ունեցող առաջարկությունը եւ ափսոսանք հայտնել, որ այդ առաջարկն իրականություն չի դարձել: Միջնորդներն ընդգծել են, որ այդ առաջարկության իրագործումը կարող է փրկել անմեղ մարդկանց կյանքը:
Համանախագահները երկու երկրների նախագահներին եւ ԼՂ փաստացի իշխանություններին են ներկայացրել հակամարտության գոտում գնահատման առաքելության զեկույցը: Նրանք նշել են, որ զեկույցը կհրապարակեն մարտի 23-ին Վիեննայում, իսկ մինչ այդ հրապարակային հայտարարություններ չեն անի: