ԱԺ «Ժառանգություն» խմբակցության պատգամավորներ Զարուհի Փոստանջյանն ու Արմեն Մարտիրոսյանը մարտի 21-ին հրավիրվել են Հատուկ քննչկան ծառայություն: NEWS.am-ի թղթակցի հետ զրույցում Զարուհի Փոստանջյանն ասաց, որ ծանուցագրում նշված է, որ իրենք հրավիրվում են որպես վկա` մարտի 3-ին Հանրապետության հրապարակում տեղի ունեցած դեպքերի հետ կապված: «Մենք վկայություն տալու ոչինչ չունենք: Քանի որ մարտի 3-ի դեպքերի հետ կապված մենք ինքներս ենք հաղորդում ներկայացրել հանցագործության մասին, մենք պետք է պնդենք եւ պահանջենք, որպեսզի մեզ ճանաչեն որպես տուժող: Միայն այդ դեպքում մենք պատրաստ կլինենք արդեն տուժողի կարգավիճակում վկայություններ տալ»,-նշեց պատգամավորը:
Հիշեցնենք, որ մարտի 3-ին Կառավարության շենքի մոտակայքում ոստիկանների եւ պատգամավորների միջեւ բախում էր տեղի ունեցել: Ըստ ցուցարարների, մոտ 40 ոստիկաններ` Երեւանի փոխոստիկանապետ Ռոբերտ Մելքոնյանի գլխավորությամբ, հարձակվել էին ակցիայի մասնակիցների վրա, քաշքշել ու հարվածներ հասցրել: Ռոբերտ Մելքոնյանն անձամբ քաշքշել է Զարուհի Փոստանջյանին: ՀԱԿ-ի անդամ Վարդգես Գասպարիին գետնին էին տապալել, բռնություն կիրառել ու բերման ենթարկվել ոստիկանություն: Դեպքի առթիվ «Ժառանգությունը» հանցագործության մասին հաղորդում է ներկայացրել ՀՔԾ: