Հայաստանի նախագահ Սերժ Սարգսյանն այսօր՝ մարտի 19-ին հրամանագիր է ստորագրել Մերուժան Տեր-Գուլանյանին եւ Նարա Շլեպչյանին Հանրային հեռուստառադիոընկերության խորհրդի անդամներ նշանակելու մասին (լիազորությունների ժամկետը` վեց տարի):
Նախագահի մամուլի գրասենյակից NEWS.am-ին հայտնում են, որ նշանակման համար հիմք է ընդունվել «Հեռուստատեսության եւ ռադիոյի մասին» ՀՀ օրենքը եւ հաշվի առնելով ՀՀ նախագահի 2011թ. փետրվարի 21-ի կարգադրությամբ ստեղծված հանձնաժողովի որոշումը:
Հանրային հեռուստառադիոընկերության խորհրդի անդամի թափուր պաշտոն զբաղեցնելու համար մրցույթի անցկացման կարգի համաձայն, մինչ Հանրապետության ղեկավարի հրամանագիրը, ՀՀ նախագահի կարգադրությամբ ստեղծված մրցութային հանձնաժողովը, քննելով մրցույթին մասնակցելու համար ներկայացված 11 դիմումը, որոշում է կայացրել մրցույթի հաղթողների վերաբերյալ: Մրցութային հանձնաժողովը որոշել է հաղթող ճանաչել Մերուժան Տեր-Գուլանյանին եւ Նարա Շլեպչյանին` հիմք ընդունելով լրագրության ոլորտում եւ հատկապես հեռուստատեսությունում այդ թեկնածուների երկարամյա աշխատանքային փորձը, ինչպես նաեւ լրագրության ոլորտի զարգացման գործում ունեցած ակնառու հաջողություններն ու ձեռքբերումները:
Նշենք, որ Մերուժան Տեր-Գուլանյանը գրող, հրապարակախոս է, ով 1978թ.-ից Գրողների Միության անդամ է եւ յոթ գրքի հեղինակ: Նա 1997թ. հիմնադրել է երկրում առաջին անկախ «ԱՐ» հեռուստաընկերությունը: 2009-2011թթ. աշխատել է Հանրային հեռուստատեսության «Արարատ» հեռուստաալիքի տնօրեն:
Նարա Շլեպչյանը 1956թ. ընդունվել է Հայաստանի հեռուստատեսության ստուդիա` որպես հաղորդավար: 2001-2011թթ. նախագահել է Հանրային հեռուստառադիոընկերության խորհրդի հանրության հետ կապերի հասարակական խորհուրդը:
