Ոստիկանության Արաբկիրի բաժնում մարտի 17-ի կեսօրին ահազանգ էր ստացվել, որ Ազատության պողոտայում գտնվող սուպերմարկետի մոտ մի երիտասարդ դանակը ձեռքին վիճաբանում է:
Ոստիկանության մամուլի ծառայությունից NEWS.am-ին հայտնում են, որ դեպքի վայր մեկնած ոստիկանության ծառայողները պարզել էին, որ նույն օրը, ժամը 12.30-ին, նշված սուպերմարկետի մոտ վիճաբանություն էր առաջացել մսամթերքի առաքիչ ոմն Հրայրի եւ սուպերմարկետի անվտանգության ծառայության աշխատակից, 23-ամյա Արսեն Բ.-ի միջեւ: Վիճաբանությանը ներկա Հրայրի կողմնակիցներից մեկը սուր ծակող գործիքով հարվածել էր Արսեն Բ.-ի թիկունքին եւ ձախ ազդրին ու պատճառել վնասվածքներ:
Ոստիկանության ծառայողների ձեռնարկած միջոցառումների շնորհիվ՝ մարտի 18-ին, ժամը 16.30-ին, բաժին են ներկայացել 27-ամյա Հրայր Հ.-ն եւ նրա տարեկից Աշոտ Ա.-ն:
Պարզվել է, որ մարտի 17-ին հիշյալ սուպերմարկետի մոտ Արսեն Բ.-ն վիճաբանել էր Հրայր Հ.-ի, Աշոտ Ա.-ի եւ նրանց ընկեր, 32-ամյա Բագրատ Թ.-ի հետ: Վեճի ընթացքում վերջինս դանակով հարվածել էր Ա.Բ.-ին եւ պատճառել վնասվածք:
Ձեռնարկվում են միջոցառումներ Բագրատ Թ.-ին հայտնաբերելու ուղղությամբ: