Իր կյանքի մեծ մասը Կանադայում ապրած 75-ամյա Գասպար Պանիրյանը Լեոն Գորցյանին լավ ընկեր է համարել ու վստահել, բայց այդ վստահությունը թանկ է արժեցել նրա վրա:
Նրանց ընտանիքները ճանաչել են միմյանց դեռ Հայաստանում: «Հանկարծ ես տեսա, որ նա այլեւս այն չէ, փոխվել է: Ես չգիտեմ, թե ինչ է եղել նրա հետ»,- ասել է Պանիրյանը: Այս մասին գրում է Global Montreal-ը:
Ուրբաթ օրը երբեմնի ընկերները դատարանի հակադիր կողմերում էին, որտեղ քննարկվում էր խոշոր մեքենայության վերաբերյալ քրգործը: Գորցյանը յուրացրել էր Պանիրյանի եւ 24 այլ մարդկանց խնայողությունները:
«Նա շատ մարդկանց կյանքեր է խորտակել եւ նա արժանի է, որ բանտում հայտնվի»,- հայտարարել է մեկ այլ տուժող Ալի Ռեզան:
Որպես լիցենզավորված բրոքեր Գորցյանն իր գործունեության 8 տարվա ընթացքում խաբել է հայ համայնքի իր ընկերներին եւ յուրացրել շուրջ 800 հազար դոլար:
Դատարանի դահլիճում դատախազ Նիկոլ Մարտինոն ասել է, որ Գորցյանին առնվազն 4 տարով պետք է ազատազրկել:
Իր մտածած ինվեստիցիոն մեխանիզմով Գորցյանը մարդկանց խոստանում էր 24 տոկոս եկամուտ: Նա իր հաճախորդներին ասում էր, որ փողերը տրվում է հիպոտեքային վարկի ձեւով՝ բնակարան գնողներին: Գորցյանն առաջարկել է իր «սեփական» տունը որպես երաշխիք, սակայն ոստիկանությունն ավելի ուշ իմացել է, որ տունն իրենը չէ:
Ջեքի Նալչայանը մեկն է Գորցյանի զոհերից, ում վերջինս անգամ սպառնացել է էլեկտրոնային փոստով: Նալչայանը ոստիկանություն է կանչել եւ նրանք զենք են գտել Գորցյանի տնից: Այդուհանդերձ, Լեոն Գորցյանի պաշտպաններն ասում են, որ նա վտանգ չի ներկայացնում եւ արժանի չէ բանտարկության:
Դատավճիռը Գորցյանի նկատմամբ կկայացվի հունիսին: