Գարեգին Բ-ն մարտի 21-ին Մայր Աթոռ Սուրբ Էջմիածնում ընդունել է պաշտոնական այցով Հայաստան ժամանած Խորվաթիայի խորհրդարանի նախագահ Լուկա Բեբիչի գլխավորած պատվիրակությանը:
Մայր աթոռի տեղեկատվական համակարգից NEWS.am-ին հայտնում են, որ Լուկա Բեբիչը երախտագիտություն է հայտնել ընդունելության համար եւ խոսել երկու ժողովուրդների պատմական ընդհանրությունների մասին` կարեւորելով երկու երկրների միջեւ հարաբերությունների սերտացումը:
Հանդիպման ընթացքում անդրադարձ է կատարվել երկու երկրների հոգեւոր կյանքին, կրոնների եւ քաղաքակրթությունների երկխոսության անհրաժեշտությանը: Խորվաթիայի խորհրդարանի նախագահին կաթողիկոսը ներկայացրել է Հայ Եկեղեցու հարաբերությունները քույր Եկեղեցիների հետ եւ ներգրավվածությունը միջկրոնական երկխոսության մեջ հանուն ժողովուրդների խաղաղ եւ ապահով կյանքի:
Զրույցի ընթացքում Ամենայն Հայոց Հայրապետը եւ Խորվաթիայի Խորհրդարանի նախագահն անդրադարձել են նաեւ Հայոց ցեղասպանության ճանաչման ու դատապարտման եւ Լեռնային Ղարաբաղի հակամարտության խաղաղ կարգավորման խնդիրներին: