Թրաֆիկինգի դեմ պայքարում Հայաստանի գլխավոր դատախազության կատարած աշխատանքներն են քննարկվել գլխավոր դատախազի տեղակալ Մնացական Սարգսյանի եւ ԱՄԷ խորհրդարանական հարցերով նախարարի տեղակալ Սայիդ Մուհամմադ ալ Ղոֆալի այսօր՝ մարտի 22-ին կայացած հանդիպման ժամանակ:
Մ. Սարգսյանը նշել է, որ ՀՀ գլխավոր դատախազի հրամանով դեռեւս 2006թ. ՀՀ գլխավոր դատախազության քննչական վարչության կազմում ստեղծվել էր առանձին ստորաբաժանում՝ մարդկանց առեւտրի եւ անօրինական միգրացիայի (թրաֆիքինգի) դեմ պայքարի բաժին, որտեղ կենտրոնացված կերպով քննվում էին թրաֆիքինգի վերաբերյալ քրեական գործերը:
Դատաիրավական բարեփոխումների երկրորդ փուլի ընթացքում ՀՀ դատախազության համակարգից հանվել է քննչական ապարատը, որի հետեւանքով թրաֆիքինգի վերաբերյալ գործերի քննությունը իրականացվել է ՀՀ ոստիկանության տարածքային եւ համայնքային քննչական բաժիններում:
Նշված հանցագործությունների կենտրոնացված քննության պրակտիկան վերականգնելու նպատակով, ՀՀ գլխավոր դատախազի հանձնարարությամբ ՀՀ ոստիկանության գլխավոր քննչական վարչության հատկապես կարեւոր գործերով քննության վարչությունում ստեղծվել է մարդկանց առեւտրի /թրաֆիքինգի/, թմրամիջոցների ապօրինի շրջանառության եւ կազմակերպված հանցագործությունների քննության բաժին:
ՀՀ գլխավոր դատախազի տեղակալ Մ. Սարգսյանը նշեց նաեւ, որ թրաֆիկինգի դեմ պայքարում ՀՀ գլխավոր դատախազության հետեւողական աշխատանքի արդյունքում Հայստանը դուրս է եկել նաեւ հատուկ վերահսկողության երկրների գոտուց: