Այսօր արաբական տարբեր պետություններում ապրում են հարյուր հազարավոր հայեր, եւ, բնականաբար, Լիբիայում եւ Բահրեյնում տեղի ունեցող իրադարձությունները չեն կարող չանհանգստացնել հայերին:
Այս մասին ասվում է «Հասարակական Խորհուրդ» երիտասարդական ՀԿ-ի
նախագահ Վ. Ասրյանի հայտարարության մեջ, որն ուղղված է ՄԱԿ-ի անվտանգության խորհրդի անդամ պետությունների ղեկավարներին:
«Ժամանակին, երբ ողջ աշխարհի աչքի առջեւ ցեղասպանության էին ենթարկվում Արեւմտյան Հայաստանում, Բաքվում եւ Սումգայիթում բնակվող հայերը, մենք` հայերս, դատապարտում էինք ձեզ՝ ձեր անգործության եւ անտարբերության համար:
Նույն զգացողությունն է նաեւ այսօր, երբ ձեր, նաեւ մեր աչքի առջեւ աֆրիկացի վարձկանների կողմից սպանդի են ենթարկվում հազարավոր արաբ եղբայրներ: Այս պահին, երբ դուք կարդում եք սույն տողերը, շարունակում են մահանալ մարդիկ միայն նրա համար, որ ցանկանում են ապրել ազատ, ոչ բռնապետական երկրում:
Ձեր կողմից ընդունված 1973 բանաձեւը եւ անվտանգության խորհրդի 5 անդամների չեզոքությունն առավել քան անտրամաբանական է, երբ բռնապետի ապագա բռնապետ որդին, դիպչելով ձեր իսկ արժանապատվությանը, ԱՄՆ-ին եւ Եվրոպային տեռորիստական երկրներ է անվանում, ծաղրածու (կլոուն) է անվանում պարոն Սարկոզիին, հակադեմոկրատական երկրներ է անվանում Արաբական Լիագային անդամակցող երկրներին, սպառնալիքներ է հնչեցնում Իրանի եւ այլ երկրների հասցեին եւ վերջապես դավաճաններ անվանում բռնապետական ռեժիմին դեմ արտահայտվող իր միլիոնավոր հայրենակիցներին»,-ասված է հայտարարության մեջ:
Հայտատարության հեղինակը ողջ հայ երիտասարդության անունից խնդրում է ցուցաբերել քաղաքական կամք, հրավիրել Անվտանգության խորհրդի եւս մեկ արտահերթ նիստ եւ հիմք ընդունելով Ժնեւյան կոնվենցիայի երկրորդ լրացուցիչ արձանագրությունը, կանխել ոճրագործությունը Լիբիայում եւ Բահրեյնում, միաժամանակ զգոնության կոչ անել նաեւ Օմանի եւ Եմենի իշխանություններին: