Հայաստանի խորհրդարանն առաջին ընթերցմամբ ընդունել է «Հավաքների ազատության մասին» օրինագիծը: Ըստ օրինագծի` նախատեսվում է մտցնել «բանակցությունների ինստիտուտը», այսինքն ակցիայի կազմակերպիչները կարող են բանակցություններ վարել պատկան մարմինների հետ` տեղի, ժամանակի եւ ընթացքի շուրջ եւ գալ փոխզիջման:
Հավաքները կարող են դադարեցվել միայն այն դեպքում, երբ խախտվում են որեւէ մեկի սահմանադրական իրավունքները կամ հանրային շահերը: Եթե ակցիան խաղաղ բնույթ է կրում, սակայն դրա անցկացման մասին տեղյակ չի պահվել լիազոր մարմիններին, իրավապահներն իրավունք չունեն դադարեցնել միջոցառումը: Ազատականացվել է նաեւ ուժային կառույցների աշխատակիցների` հավաքներին մասնակցելու կարգը:
Ինչպես արդեն հայտնել է NEWS.am-ը, խորհրդարանի խոսնակ Հովիկ Աբրահամյանն ավելի վաղ առաջարկել էր վերանայել օրենսդրության 7-րդ կետը։ «Առաջարկում եմ 7-րդ հոդվածում ամրագրել հետեւյալ կետը. հավաքի կազմակերպիչը դրա ղեկավարն է։ Եթե հավաքը կազմակերպվել է իրավաբանական անձի կամ իրավաբանական անձանց խմբի կողմից, ուրեմն հավաքի ղեկավարը հանդիսանում է այդ իրավաբանական անձանց ղեկավարը»,- հայտարարել էր Աբրահամյանը։
Նրա առաջարկը հիմնականում Հայ ազգային կոնգրեսին էր վերաբերում։ Աբրահամյանը ցանկանում էր իմանալ՝ օրենքով ո՞վ է ՀԱԿ-ի կազմակերպած հանրահավաքների ղեկավարը:
Արդարադատության նախարարն ընդունելի է համարել առաջարկը։ Թովմասյանը միաժամանակ ընդգծել, որ ՀԱԿ-ը իրավաբանական-կազմակերպչական կարգավիճակ չունի։ Իսկ եթե խոսքը կոնկրետ ՀԱԿ-ի մասին է, ապա, նախարարի խոսքով, օրենքում կամ պետք է փոփոխություններ մտցնել կամ էլ դա այն օրենքը չէ, որ պետք է կարգավորի նմանօրինակ հարցերը։