Odnoklassniki.ru կայքում գրանցված մասնակիցների շրջանում Հայաստանից օգտվողները բավականին շատ են, սակայն նախկին ԽՍՀՄ տարածքից ամենաշատը Հայաստանի օգտագործողներն են, որ ունեն մի քանի անհատական էջ։ Այս մասին NEWS.am- Ինովացիայի թղթակցի հետ զրույցում ասաց Մարկետինիգի հայկական ասոցիացիայի նախագահ Արամ Նավասարդյանը։ Նրա խոսքով՝ այս հանգամանքից ելնելով, դժվար է ասել, թե Հայաստանից սոցիալական ցանցը օգտագործողների իրական թվաքանակը որքան է։

«Հայ օգտագործողները էջեր ունեն նաեւ ընկերների, ընկերուհիների, անծանոթների համար։ Այս հանգամանքը մի քանի անգամ նվազեցնում է սոցիալական ցանցում տեղադրվող գովազդի արդյունավետությունը»,-ասաց Ա. Նավասարդյանը։ Նրա խոսքով՝ սա ոչ թե odnoklassniki.ru-ի կամ տեղական գովազդ վաճառողի խնդիրն է, այլ ուղղակի առանձնահատկություն է, որը պետք է հաշվի առնել սոցցանցում գովազդ տեղադրելիս։