Մոսկվայի հայկական «Մայրիկ» սրճարանում «Եվրո 2012»-ի ընտրական Հայաստան-Ռուսաստան խաղին հետեւելու են հայ եւ ռուս երիտասարդներ իրենց բարձր տարիքի ընկերների հետ։ Ինչպես NEWS.am-ին տեղեկացրին Ռուսաստանի հայերի միությունից, սրճարանում խաղին հետեւելու համար տեղադրվելու են մեծ էկրաններ։
«Հայ եւ ռուս ֆուտբոլասերները միասին կերկրպագեն մեր թիմերին` գեղեցիկ եւ դինամիկ խաղի համար։ Վստահ ենք, որ այս հանդիպումը բոլորիս համար սպորտային գեղեցիկ իրադարձություն կդառնա, եւ խաղի ցանկացած արդյունքի դեպքում միեւնույն է կհաղթի բարեկամությունը»,- նշված է ՌՀՄ տարածած հաղորդագրությունում։
Տեղեկացնենք, որ ՌՀՄ-ն խաղին հետեւելու համար նախատեսված մեծ էկրաններ է տեղադրել Ռուսաստանի գրեթե բոլոր շրջաններում։
Հիշեցնենք, որ Երեւանի քաղաքապետ Կարեն Կարապետյանի հանձնարարությամբ, մայրաքաղաքի Սայաթ-Նովա եւ Մաշտոցի պողոտաների խաչմերուկում տեղադրված հսկայական էկրանով եւս հեռարձակվելու է Հայաստան-Ռուսաստան ֆուտբոլային հանդիպումը։
Նշենք, որ երկու երկրների «Եվրո-2012» մրցաշարի ընտրական փուլի հանդիպումը տեղի կունենա մարտի 26-ին Վ. Սարգսյանի անվան հանրապետական մարզադաշտում՝ Երեւանի ժամանակով ժամը 20։00-ին։
