Իրանական Նովրուզ տոնը, որը մեկնարկել է մարտի 21-ից, Հայաստան է բերել հարավային մեր հարեւաններին` իրանցիներին, ովքեր, իրենց իսկ ձեւակերպմամբ, հանգիստ ու ապահով պայմաններում վայելում են իրենց ամենասիրելի տոներից մեկը: Իրանցիների շրջանում ընդունված է  Նովրուզը դիմավորել երկրից դուրս, հիմնականում այնպիսի բաց  երկրներում, որտեղ ոգելից խմիչքների օգտագործման արգելք չկա, զվարճանքի եւ  վայելքների վայրերը բաց են, մի խոսքով, այնպիսի երկրներում, որտեղ հնարավոր կլինի մի լավ լիցքաթափվել: NEWS.am-ը զրուցել է Հայաստանում տոնն անցկացնող իրանցիների հետ, եւ պարզել, որ նրանց Երեւան է բերել իրենց սիրելի երգիչներին ունկնդրելու հանգամանքը: Բանն այն է, որ իրանցի մի շարք երգիչներ արգելված են Իրանում: Նրանք իրենց իրանցի հանդիսատեսի հետ հանդիպելու համար Նովրուզի կապակցությամբ համերգերով են հանդես գալիս տարածաշրջանի այլ երկրներում`Հայաստանում, Թուրքիայում, ԱՄԷ-ում, Ադրբեջանում:

Իրանցիների սիրելի երգիչների ցանկում է նաեւ հայազգի Անդին, ով այս օրերին համերգներով է հանդես գալիս Հայաստանում:

Բարեկամ երկրի քաղաքացիների համար Հայաստանը թանկ երկիր է: Նրանց հետ զրույցից պարզվեց, որ թեեւ հիմնականում գոհ են մատուցվող ծառայությունների որակից, սակայն գներից` դժգոհ: «Պարսկաստանի համեմատ Հայաստանում ապրանքները երեք անգամ թանկ են: Անցած մի քանի օրերի ընթացքում ահագին փող եմ ծախսել»,- ասաց Թեհրանից եկած մի իրանցի: Նա Հայաստան է եկել կնոջ եւ մանկահասակ երեխայի հետ, վարձել է բնակարան, որի համար օրական 90 դոլար է վճարում: «Գոհ ենք, լավ մեծ տուն է կենտրոնում, մոտ 130 քմ: Ճանաչում եմ մեզանից առաջ եկած մի ընտանիքի, որը ավելի թանկ է վճարում տան համար` մոտ 200 դոլար»: NEWS.am-ի զրուցակիցը նշեց նաեւ, որ նախորդ տարիներին Նովրուզն անցկացրել է Ճապոնիայում, Չինաստանում, Դուբայում, սակայն չի ստացել այն հաճույքը, ինչը Հայաստանում: «Հայաստանը լավ երկիր է»,-ասաց թեհրանցին ու ձեռքի բութ մատը վեր պարզեց:

Թավրիզից եկած մի քանի երիտասարդներ էլ ասացին, որ ամեն տարի Նովրուզը դիմավորում են տարբեր երկրներում, այս տարի էլ որոշել են Հայաստան գալ: Ասացին, որ իրենց ընդհանուր առմամբ դուր է գալիս Հայաստանը, սակայն լիաթոք զվարճանալու համար ամենահարմար երկիրը Թուրքիան է: Նրանք Հայաստանում կմնան եւս երկու-երեք օր, այնքան, քանի դեռ գրպաններում փող կա:

Ի դեպ, այս օրերին ծանրաբեռնված են աշխատում հանրապետության տաքսի ծառայությունները: Նրանցից մի քանիսի հետ զրույցում պարզեցինք, որ իրանցիները հիմնականում հաստատվել են մայրաքաղաքի ծայրամասերում, որտեղից օրը մի քանի անգամ տաքսիով մայրաքաղաքի կենտրոն են գալիս` այցելելու ռեստորաններ ու զվարճանքի վայրեր: «Հանգիստ, խելոք ժողովուրդ են: Ճիշտ ա, իրար լեզու չենք հասկանում, բայց վերջում իրարից դժգոհ չենք մնում»,-վստահեցրեց տաքսիստներից մեկը: Իրանցի մեր հյուրերը, ինչպես պարզեցինք Հանրապետության հրապարակում ծառայություն իրականանցնող ոստիկաններից, կարգապահ են, այս օրերին նրանց մասնակցությամբ որեւէ միջադեպ չի արձանագրվել: «Երբ իրենց ասում ես` սա-սա-սա չի կարելի, միանգամից հասկանում են, ներողություն են խնդրում, ու էլ նույն արարքը չեն անում»,- վստահեցրեց ոստիկաներից մեկը: Նրա հետ, սակայն, չհամաձայնեց  Հրապարակի ջրավազանի մաքրության համար պատասխանատու տարեց տղամարդը: Նա բողոքեց, թե «պարսիկները ահավոր փնթի են» ու աղտոտում են ջրավազանն ու դրա շրջակայքը: «Հազար անգամ զգուշացնում եմ, որ թուղթ եւ սիգարետ մի քցեք «բասեինի» մեջ, չեն հասկանում»,- դժգոհեց նա: 

Հ, Գ. Նշենք, որ այս տարի Նովրուզին ընդառաջ, ըստ  ՀՀ էկոնոմիկայի նախարարության զբոսաշրջության վարչության տվյալների,  Հայաստան է այցելել մոտ 20 հազար իրանցի զբոսաշրջիկ: Նրանցից յուրաքանչյուրը Հայաստանում գտնվելու ընթացքում ծախսում է շուրջ 1200 ԱՄՆ դոլար:

Պատրաստեց` Ելենա Գեւորգյանը