Ազատության պողոտայում` «Գոլդեն Փալաս» հյուրանոցային համալիրի դիմաց, մարտի 28-ին, ժամը 19:30-ի սահմաններում տեղի է ունեցել ավտովթար: Իրար են բախվել Volkswagen մակնիշի 10 ԼՏ 978 համարանիշի, «Շեվրոլետ» մակնիշի Տ 5472 համարանիշի տաքսի, եւ ՄԱԶ մակնիշի բեռնատար 184 ԼՕ 68 համարանիշի ավտոմեքենաները:
Ինչպես NEWS.am-ին հայտնեց ֆոտոլրագրող Գագիկ Շամշյանը, վթարի հետեւանքով երկու հոգի մարմնական վնասվածքներով տեղափոխվել են «Միքայելյանի անվան վիրաբուժության ինստիտուտ»:
Ականատեսները հայտնել են, որ վիրավորներն Իրանի Իսլամական Հանրապետության քաղաքացիներ են:
Այս պահին ոստիկանության քննչական գլխավոր վարչության Երեւանի քննչական վարչության ճանապարհատրանսպորտային հանցագործությունների քննության բաժնի քննիչ Աշոտ Ասատուրյանը Երեւանի ՃՈ աշխատակիցների հետ վթարի վայրում քննչական աշխատանքներ է կատարում:
Քննչական աշխատանքներ կատարելուց հետո քննիչի հանձնարարականով ավտոմեքենաները կտեղափոխվեն Երեւանի ՃՈ տուգանային հրապարակ, իսկ քննիչը մեկնելու է հիվանդանոց` ճշտելու վիրավոր անձանց ինքնությունը:
Դեպքի վայրում են նաեւ ապահովագրական ընկերության ներկայացուցիչները:
Լուսանկարները եւ տեսանյութը՝ Գագիկ Շամշյանի