Ոստիկանության կենտրոնականի քննչական բաժնում հարուցվել է քրեական գործ Հայաստանի քր.օր.-ի 316 հոդվածի հատկանիշներով:
Ինչպես NEWS.am-ին հայտնում է ֆոտոլրագրող Գագիկ Շամշյանը, նշված քրեական գործը հարուցվել է 27-ամյա Վահե Կամոյի Սահակյանի նկատմամբ: Նա, Mercedes մակնիշի 777 ԼԼ 47 համարանիշի ավտոմեքենան «Տաշիր» առեւտրի կենտրոնի դիմաց քշել է քաղաքացիների եւ Հայաստանի ճանապարհային ոստիկանության 1-ին գումարտակի 2-րդ վաշտի 2-րդ դասակի հրամանատար Արմեն Սարգսյանի վրա` չենթարկվելով իշխանության ներկայացուցչի հրահանգներին: Ոստիկանության քննչական գլխավոր վարչության Կենտրոնի բաժնի քննիչը դիմել էր Կենտրոն եւ Նորք-Մարաշ վարչական շրջանների ընդհանուր իրավասության դատարան` երկամսյա կալանք կիրառելու միջնորդությամբ, եւ Սահակյանը դատարանի որոշմամբ տեղափոխվել է «Նուբարաշեն» ՔԿՀ:
Ականատեսները ֆոտոլրագրողին հայտնել են, որ երբ ոստիկանությունը փորձում էր նրան կարգի հրավիրել եւ տեղափոխել ոստիկանության բաժին, նա ներկայանում էր, որ առեւտրի կենտրոնի անվտանգության ծառայության պետի եղբայրն է:
Տվյալ համարանիշով Mercedes-ը գրանցված է Շիրակի մարզում` «Թերո» ՍՊԸ-ի հաշվեկշռում:
Լուսանկարները եւ տեսանյութը՝ Գագիկ Շամշյանի