ԼՂ հակամարտությունը համարվում է ոչ թե «սառեցված», այլ` շարունակվող: Ինչպես փոխանցում է APA-ն, այս մասին մարտի 28-ին հայտարարել է ԵԱՀԿ Մինսկի խմբի ամերիկացի համանախագահ Ռոբերտ Բրադկեն` Քարնեգի հիմնադրամի Վաշինգտոնյան ֆոնդի կողմից կազմակերպված ԼՂ հակամարտությանը նվիրված քննարկման ժամանակ: Բրադկեի խոսքով, տարածաշրջանում ապրող մարդիկ արժանի են ավելի կայուն, ավելի լավ եւ ապահով ապագա ունենալ, եւ հանուն այդ ապագայի նրանք պետք է օգտագործեն բոլոր միջոցներն ու հնարավորությունները:
«Իրավիճակը դեռեւս անկայուն է: Այս հակամարտությունը հաճախ չի լուսաբանվում մամուլում»,-ընդգծել է միջնորդը: Չնայած այս հանգամանքին, ամերիկացի համանախագահը վստահեցրել է, որ ԱՄՆ-ը զբաղվում է ԼՂ հակամարտությունը խաղաղ ճանապարհով կարգավորելու ուղղությամբ:
«Հնարավոր է` ԼՂ հարցում ստատուս-քվոյի պահպանումը ինչ-որ մեկին ձեռնտու է, սակայն առկա իրավիճակը կայունություն չի երաշխավորում»,- ասել է նա:
Հայտնելով, որ տարվա ընթացքում 16 այց է կատարել տարածաշրջան, Բրադկեն հավելել է, թե ԱՄՆ-ը սերտ համագործակցում է Ֆրանսիայի եւ Ռուսաստանի Դաշնության հետ` շուտափույթ խաղաղության հասնելու նպատակով: Նա նաեւ նշել է, որ բոլոր կողմերը համաձայն են այն մտքի հետ, որ չի կարելի թույլ տալ նոր պատերազմ Հարավային Կովկասում: