Սաուդյան Արաբիայի պաշտպանության նախարարությունը հայտարարել է, որ չորեքշաբթի կներկայացնի թագավորության արեւելքում նավթային օբյեկտների վրա հարձակմանն Իրանի մասնակցության ապացույցներ: Սաուդյան պետական «Ալ Իհբարիա» հեռուստաալիքը հայտնել է, որ երկրի պաշտպանական գերատեսչությունը չորեքշաբթի այս թեմայով մամուլի ասուլիս կտա, փոխանցում է «ՌԻԱ Նովոստի»-ն:
«Կներկայացվեն Saudi Aramco-ի օբյեկտների վրա հարձակմանը իրանական ռեժիմի մասնակցության ապացույցներ, նաեւ կներկայացվի իրանական զենքը, որն օգտագործվել էր հարվածներ հասցնելիս»,- հայտարարել է ռազմական գերատեսչությունը:
Անցած շաբաթ սաուդյան պետական Saudi Aramco ընկերության ձեռնարկությունները հարձակման էին ենթարկվել, որի հետեւանքով թագավորությունը զրկվել էր նավթի արդյունահանման ավելի քան 50 տոկոսից: Սաուդյան Արաբիայի էներգետիկայի նախարար Աբդել Ազիզ բեն Սալմանը երեքշաբթի երեկոյան լրագրողներին հայտնել էր, որ չնայած հարձակմանը, թագավորությունը նախկին ծավալով է նավթ արտահանում, եւ սեպտեմբերին արտահանման ծավալը չի փոփոխվի: Ընդ որում՝ Էր Ռիադը հույս ունի, որ արտադրական հզորությունները օրական 11 մլն բարել մակարդակին կվերադարձնի սեպտեմբերի վերջին, իսկ 12 մլն-ի՝ նոյեմբերի վերջին:
Եմենցի ապստամբ հուսիները, որոնց դեմ պատերազմում է Սաուդյան Արաբիայի գլխավորած արաբական կոալիցիան, հայտարարել էին, որ իրենք են իրագործել հարձակումը: ԱՄՆ պետքարտուղար Մայք Պոմպեոն հայտարարել էր, թե վկայություններ չկան, որ հարձակումը կատարվել է Եմենից, եւ դրա մեջ մեղադրել էր անմիջաբար Իրանին: Թեհրանն իրեն ուղղված մեղադրանքները հերքում է: Էր Ռիադը հայտարարել է, որ միջազգային մասնագետների կհրավիրի հետաքննությանը մասնակցելու համար:
