Հայերը միշտ կսպասեն այն օրվան, երբ ԱՄՆ նախագահը կասի «ցեղասպանություն» բառը: Այդ մասին հայտարարել է Հայաստանի նախագահ Սերժ Սարգսյանը` ասելով, թե ինչ սպասելիքներ ունի 20-րդ դարի սկզբին Օսմանյան Թուրքիայում հայերի ցեղասպանության տարելիցի կապակցությամբ Սպիտակ տան ամենամյա ուղերձից:
«Մենք միշտ ցանկացել ենք, որ ԱՄՆ նախագահը հստակ գնահատական տա կատարվածին: Ես ժամանակին անձամբ եմ խնդրել ԱՄՆ նախագահին անել դա, բայց ցանկությունն ու իրականությունը տարբեր բաներ են, եւ ավելի լավ է, երբ ցանկությունները համընկնում են իրականության հետ», - մարտի 31-ին Երեւանում կայացած Շվեյցարիայի նախագահ Միշելին Կալմի-Ռեյի հետ համատեղ մամուլի ասուլում նշել է Սերժ Սարգսյանը:
Հայաստանի նախագահը ցանկացել է, որ այս անգամ հայ ժողովրդի իղձն իրականանա, բայց եթե նույնիսկ դա տեղի չունենա, Սերժ Սարգսյանը կոչ է արել չհիասթափվել եւ շարունակել ջանքերը` այդ համատեքստում ընդգծելով զանգվածային լրատվամիջոցների դերը:
Հիշեցենենք, որ 2010թ. ապրիլի 24-ին ԱՄՆ նախագահ Բարաք Օբաման իր ուղերձում ոչ մի անգամ չնշեց «գենոցիդ» բառը` խախտելով նախընտրական խոստումը:
Հայոց ցեղասպանությունը ճանաչել են 21 երկրներ եւ ԱՄՆ-ի 43 նահանգներ: 1965-ին առաջինը հայերի ցեղասպանությունը ճանաչել է Ուրուգվայը: Հայոց ցեղասպանությունը ճանաչել են նաեւ Եվրոպական խորհրդարանը, Վատիկանը եւ Եկեղեցիների համաշխարհային խորհուրդը:
Թուրքիան ավանդաբար ժխտում է Առաջին համաշխարհային պատերազմի տարիների հայերի բնաջնջման մեղադրանքները եւ հիվանդագին է արձագանքում Հայոց ցեղասպանության հարցում Արեւմուտքի քննադատությանը: