Երեւանում այսօր` մարտի 31-ին, ժամը 17:30-ի սահմաններում խոշոր ավտովթար է տեղի ունեցել Դավիթ Անհաղթի փողոցում:
Ինչպես NEWS.am-ին հայտնեց ֆոտոլրագրող Գագիկ Շամշյանը, ավտովթարը տեղի է ունեցել Քանաքեռ Զեյթուն վարչական շրջանի վարչակազմի շենքի դիմաց միմյանց են բախվել BMW-318 մակնիշի 25 ՏՕ 401 համարանիշի, «Ֆոլքսվագեն Տուարեգ» մակնիշի 19 ՍՍ 120 համարանիշի եւ «Տոյոտա Պրադո» մակնիշի 09 ՍՍ 309 համարանիշի ավտոմեքենաները:
Բախման արդյունքում «Տոյոտա Պրադոն» շուռ է եկել: Ուղեւորներին մեքենաներից դուրս բերելու համար վթարի վայր էին ժամանել Հայաստանի ԱԻՆ փրկարար ծառայության արագ արձագանքման փրկարարական խումբը: Դեպքի վայրից մարմնական վնասվածքով Միքայելյանի անվան հիվանդանոց է տեղափոխվել մեկ մարդ:
Դեպքի վայր են ժամանել Երեւանի ճանապարհային ոստիկանության աշխատակիցները, որոնք 30 րոպեից ավելի փորձում էին հավաքված հետաքրքրասեր քաղաքացիներին հեռացնել վթարի վայրից: ՃՈ տեսուչներին օգնության եկան ոստիկանության Քանաքեռ-Զեյթունի պարեկապահակային ծառայության եւ տեղամասային տեսուչ-ոստիկանները:
«Տոյոտա Պրադոյի» վարորդը վթարի վայրից իր ավտոմեքենայի համարանիշները հանեց, իսկ երբ ճանապարհային ոստիկանը նրանից պահանջում էր համարանիշները, նա սպառնում էր ՃՈ տեսուչին: Ի դեպ, նա խոչընդոտում էր նաեւ լրագրողական աշխատանքին:
Դեպքի վայր էին ժամանել ոստիկանության քննչական գլխավոր վարչության Երեւանի քննչական վարչության ճանապարհա-տրանսպորտային հանցագործությունների քննության բաժնի աշխատակիցները` քննիչ Դավիթ Մարտիրոսյանի գլխավորությամբ: Վերջինիս հանձնարարականով «Ֆոլքսվագեն Տուարեգի» վարորդը համարանիշները հանձնեց ՃՈ տեսուչներին:
Քննիչի հանձնարարականով ավտոմեքենաները քարշակի օգնությամբ տեղափոխվեցին Երեւանի ՃՈ տուգանային հրապարակ:
Լուսանկարները եւ տեսանյութը՝ Գագիկ Շամշյանի
