Թմրամիջոցների ապօրինի շրջանառության եւ մաքսանենգության դեմ պայքարի ոլորտում կիրառվող մեթդներն ու միջոցները շատ հեռու են բավարար լինելուց: Այս մասին ըստ Գլխավոր դատաազության մամուլի ծառայության հաղորդագրության, նշվել է գլխավոր դատախազության կոլեգիայի վերջին նիստում: Նիստում քննարկվել են թմրամիջոցների ապօրինի շրջանառության եւ մաքսանենգության դեմ պայքարին վերաբերող հարցեր:
Գլխավոր դատախազության տվյալներով, 2009թ. արձանագրված թմրամիջոցների մաքսանենգության 22 դեպքից ընդամենը 3-ն է բացահայտվել մաքսային հսկողության ընթացքում, մինչդեռ 17 դեպքը բացահայտվել է մաքսային հսկողությունն անցնելուց հետո` ազգային անվտանգության ծառայության, իսկ 2-ը` ոստիկանության աշխատակիցների կողմից:
Ինչ վերաբերում է 2010թ., ապա նույն կատեգորիայի 49 դեպքից միայն 18-ն է մաքսավորների կողմից բացահայտվել մաքսային հսկողության ընթացքում: Մյուս 31 դեպքը բացահայտվել է մաքսային հսկողությունն անցնելուց հետո, 20-ը` ՀՀ ազգային անվտանգության ծառայության, իսկ 11-ը` ոստիկանության աշխատակիցների կողմից:
Սրա հետ կապված դատախազությունը անհրաժեշտ է համարում մաքսանենգությունների, հատկապես թմրամիջոցների ապօրինի շրջանառության կանխարգելումն ապահովելու նպատակով մաքսային հսկողության ընթացքում կիրառել ժամանակակից մեթոդներ և միջոցներ` ներդնել մերկացնող սկաներներ, հատուկ վարժեցված շներ, որոնցով թմրանյութեր հայտնաբերելու պրակտիկան ներկայումս լայն կիրառում ունի եվրոպական երկրներում:
