2010 թվականին Հայաստանում իրավապահների կողմից բացահայտվել է թմրամիջոցների ապօրինի շրջանառության մեջ ներգրավված 62 մաքսանենգ:
Գլխավոր դատախազության մամուլի ծառայությունից NEWS.am-ին հայտնում են, որ դրանցից 50-ը եղել են օտարերկրացի, որոնցից 49-ը` Իրանի եւ 1-ը` Ֆրանսիայի քաղաքացիներ, 48-ը` տղամարդ, 2-ը կին (Իրանի եւ Ֆրանսիայի քաղաքացիներ), իսկ 12-ը` ՀՀ քաղաքացիներ, որոնցից 5-ը` նախկինում դատապարտված:
2009 թվականի ընթացքում ապօրինի շրջանառությունից ընդհանուր առմամբ առգրավվել եւ փորձաքննության են ներկայացվել 56,8 կգ տարբեր տեսակի թմրամիջոցներ: 2010 թվականի ընթացքում հայտնաբերվել եւ առգրավվել է 126, 5 կգ տարբեր տեսակի թմրամիջոցներ:
2009-ին քրեական պատասխանատվության է ենթարկվել 780, իսկ 2010-ին` 854 մարդ:
Ընդհանուր առմամբ, 2010-ին արձանագրվել է թմրամիջոցների ապօրինի շրջանառության 49 դեպք: Դրանցից 40-ը վերաբերել են թմրանյութերի ներկրմանը, մեկ դեպք` արտահանմանը, եւս 8 դեպքում հայաստանը եղել է տարանցիկ երկիր: