Պաշտոնական այցով Սերբիայում գտնվող Հայաստանի նախագահ Սերժ Սարգսյանն այսօր` ապրիլի 5-ին հանդիպում է ունեցել Սերբիայի Պատրիարք Իրինեյի հետ. նրանք կարեւորել են Հայ Առաքելական Եկեղեցու եւ Սերբ Ուղղափառ Եկեղեցու միջեւ ձեւավորված ջերմ հարաբերությունները:
Նախագահի մամուլի գրասենյակից NEWS.am-ին հայտնում են, որ զրուցակիցները հույս են հայտնել, որ առկա համագործակցությունը հետզհետե կընդլայնվի, իսկ հայ եւ սերբ ժողովուրդների շփումները շարունակաբար կընդլայնվեն:
Նախագահ Սերժ Սարգսյանը նշել է, որ հայ ժողովրդի պատմության մեջ եկեղեցին բացառիկ դերակատարություն է ունեցել` պետականության բացակայության պայմաններում հաճախ ստաձնելով ազգի համախմբման եւ առաջնորդելու բարձր առաքելությունը: Հանրապետության ղեկավարի խոսքով, այսօր էլ հայերի, ինչպես եւ սերբերի համար, եկեղեցու դերն անփոխարինելի է:
Պատրիարք Իրինեյի հետ հանդիպմանը ՀՀ նախագահը հատկանշական է համարել նաեւ, որ Կոսովոյում գտնվող հայկական խաղաղապահ գումարտակն իր լիազորությունների շրջանակում արել է հնարավորը` պաշտպանելով Կոսովոյում գտնվող սերբական եկեղեցիները:
Այսօր Սերժ Սարգսյանը Բելգրադում հանդիպել է Սերբիայի հայ համայնքի ներկայացուցիչների հետ եւս:
Հանրապետության ղեկավարը ծաղիկներ է դրել մայրաքաղաքի Ս. Գաբրիել Հրեշտակապետ եկեղեցու հարեւանությամբ տեղադրված 1988թ. երկրաշարժի օրերին Հայաստանում զոհված սերբ օդաչուների հիշատակը հավերժացնող հայկական խաչքարին, զրուցել`օդաչուների հարազատների հետ:
Ավարտելով պաշտոնական այցը Սերբիայի Հանրապետություն` Նախագահ Սերժ Սարգսյանը երեկոյան վերադարձել է Երեւան:
