Հայաստանի մշակութային ժառանգության պահպանության համար Իտալիան 1 մլն 274 հազար եվրո գումար կհատկացնի։ Այս մասին ապրիլի 6-ին Հայաստանի մշակույթի նախարարության եւ Իտալիայի ԱԳՆ համագործակցության զարգացման գլխավոր վարչության միջեւ կնքված համաձայնագրի ստորագրումից հետո հայտնել է Հայաստանի մշակույթի նախարար Հասմիկ Պողոսյանը։
Նա ընդգծել է, որ համաձայնագիրը վերջին շրջանում ստորագրված մշակութային ժառանգության պահպանության վերաբերյալ կարեւորագույն փաստաթղթերից է։ Համաձայնագրի ֆինանսական կողմն ապահովելու է Իտալիայի կառավարությունը, իսկ կազմակերպչականը՝ հայկականը կողմը։
Նախարարը նշել է, որ համաձայնագրի ծրագրի շրջանակում Հայաստանի ճարտարագիտական համալսարանի մագիստրատուրայի ուսանողները հնարավորություն կստանան փորձ ձեռք բերել Միլանի պոլիտեխնիկական ինստիտուտում։ Ծրագրով նախատեսվում է նաեւ Հայաստանի մշակույթի նախարարության աշխատակիցների վերաորակավորման կուրսերի, վերականգնող շինարարների հատուկ դասընթացների անցկացում։
Նախատեսված է «Էրեբունի» արգելոց-թանգարանում որմնանկարների եւ հնագիտական գտածոների վերականգնման հատուկ լաբարատորիայի ստեղծում։