Երեւանում ապրիլի 7-ին, ժամը 00:50-ի սահմաններում Աբովյան փողոցի թիվ 33 շենքի դիմաց տեղի է ունեցել ավտովթար:

Ինչպես NEWS.am-ին հայտնեց ֆոտոլրագրող Գագիկ Շամշյանը, Բակունցի անվան մանկավարժական քոլեջի 3-րդ կուրսի ուսանողուհի, 20-ամյա Շողիկ Թովմասյանը, վարելով Suzuki մակնիշի 24 ՏԼ 124 համարանիշի ավտոմեքենան, ընդհարվել է Range Rover մակնիշի ավտոմեքենային, որից հետո նշված փողոցում կայանված «Պեժո 207» մակնիշի 11 ՕՏ 640 համարանիշի ավտոմեքենային: «Պեժոն» վարել է 30-ամյա Գեւորգ Թադեւոսյանը:

Մինչ դեպքի վայր կժամանեին Երեւանի ճանապարհային ոստիկանության աշխատակիցները, Range Rover-ի վրայից հանել էին համարանիշները: Ականատեսները ֆոտոլրագրողին հայտնել են, որ համարանիշները եղել են 888 ՏՕ 88: Այն գրանցված է Ազգային Ժողովի ԲՀԿ-ական պատգամավոր, «Յուվեցի Կարո» մականվամբ Կարո Կարապետյանին պատկանող «Շահումյան-Վին» ՍՊԸ-ի հաշվեկշռում, սակայն մեքենան օգտագործում է Հայաստանի ազգային օլիմպիական կոմիտեի քարտուղար, ԲՀԿ անդամ Հրաչյա Ռոստոմյանը: Վարորդը եղել է  Արագածոտնի մարզի Ոսկեվազ գյուղի 26-ամյա բնակիչ Լուկաշ Հարությունյանը:

Վթարի վայր են ժամանել մեծ թվով ԲՀԿ-ականներ, ովքեր փորձում էին դեպքի վայրում քննչական աշխատանքներ կատարող ոստիկանության քննչական գլխավոր վարչության Երեւանի քննչական վարչության ճանապարհատրանսպորտային հանցագործությունների քննության բաժնի Խաչիկ Սամվելյանին ցուցումներ տալ եւ համոզել, որպեսզի Range Rover-ը չտեղափոխվի տուգանային հրապարակ:

Քննիչի հանձնարարականով երեք ավտոմեքենաներն էլ տեղափոխվեցին տուգանային հրապարակ:

Վթարի հետեւանքով Շողիկ Թովմասյանը տեղափոխվել է թիվ 1 համալսարանական հիվանդանոց:

Լուսանկարները եւ տեսանյութը` Գագիկ Շամշյանի