Հայաստանում սահմանափակվել է խաղաղ ընտրությունների միջոցով կառավարությունը փոխելու քաղաքացիների իրավունքը։ Այս մասին ասված է Հայաստանում մարդու իրավունքների վիճակի մասին ապրիլի 8-ի հրապարակված ԱՄՆ Պետքարտուղարության ամենամյա զեկույցում։
«Իրավապահ մարմինների որոշ ներկայացուցիչներ շարունակել են խախտել մարդու իրավունքները՝ մնալով անպատիժ։ Տարվա ընթացքում արձանագրվել են բանակում խաղաղ պայմաններում գրանցված կասկածելի մահվան մի շարք դեպքեր։ «Դեդովշինան» եւ դաժան վերաբերմունքը շարունակվել են։ Ոստիկանները ձերբակալությունների եւ հարցումների ժամանակ ծեծի էին ենթարկել քաղաքացիներին։
Իշխանությունները շարունակել են կասկածյալներին ձերբակալել եւ պահել առանց բավարար հիմքերի։ Դատարանները մնում են իշխանությունների կողմից քաղաքական ճնշման առարկա։
Զանգվածային լրատվամիջոցնրում, մասնավորապես հեռեւստատեսությունում, շարունակում է բազմակարծության բացակայությունը։ Շարունակվել են մամուլի ներկայացուցիչների հանդեպ բռնության դեպքերը։
Իշխանությունները շարունակել են մերժել ընդդիմության՝ հանրահավաքներ անցկացնելու խնդրանքները։ Որոշ դեպքերում իշխանությունները ջանացել են խոչընդոտել հանրահավաքներին մարդկանց մասնակցությանը։
Կոռուպցիան շարունակում է խնդիրներից մեկը մնալ, սակայն իշխանությունները դրա դեմ պայքարելու քայլեր են ձեռնարկել։ Բռնությունն ընտանիքներում շարունակում է սովորական երեւույթ մնալ։ Իշխանությունները քայլեր են ձեռնարկում թրաֆիկինգի դեմ պայքարի ուղղությամբ»,- ասված է զեկույցում։
