ԵԽԽՎ ամբիոնից հնչեցրած իր ապրիլի 11-ի ելույթում հայկական պատվիրակության անդամ Նաիրա Զոհրաբյանն անդրադարձել է կրոնական եւ մշակութային անհանդուրժողականության թեմային: Նա խոսել է, մասնավորապես, Ջուղայի հայկական գերեզմանոցում պաշտոնական Ադրբեջանի կողմից ոչնչացված համաշխարհային մշակութային արժեքներ հանդիսացող խաչքարերի մասին:
Ն. Զոհրաբյանն իր ելույթում նշել է. «Երբ վանդալները, որոնց կրոնական, քաղաքական անհանդուրժողականությունն այլոց մշակույթի հանդեպ հանգեցնում է վանդալիզմի, չեն պատժվում, ես դժվարանում եմ հասկանալ, թե ինչպես մենք պիտի խթանենք հարգանքը կրոնական բազմակարծության, միմյանց մշակութային բազմազանությունն ու ժառանգությունը հարգելու հանդեպ: 1998 թվականից պաշտոնական Ադրբեջանը հետեւողականորեն սկսեց իրագործել Նախիջեւանի Ջուլֆա գավառում գտնվող հայկական պատմական գերազմանոցի ոչնչացումը: 2005 թվականին արդեն հնագույն գերեզմանոցը, որը մարդկության մշակութային բացառիկ արժեքներից մեկն էր` ադրբեջանցի զինծառայողները հավասարեցրեցին հողին եւ վերածեցին ռազմական բազայի:
Յոթ տարի շարունակ ադրբեջանական վանդալները ոչ միայն հողին հավասարեցրեցին Ջուղայի պատմական գերեզմանոցի բացառիկ խաչքարերը, այլեւ ոչնչացրեցին 9-ից 12-րդ դարերի Ամենափրկիչ վանքը, Պոմբլոզի ժամը, սուրբ Աստվածածին եկեղեցին եւ մշակութային այլ կոթողներ: 2006 թվականին Եվրոպական խորհրդարանը դատապարտեց Ջուղայում տեղի ունեցածը, եւ կոչ արեց Ադրբեջանի իշխանություններին վերջ դնել հայկական միջնադարյան գերեզմանոցների եւ Նախիջեւանի պատմական խաչքարարի ոչնչացումը: Եւ անգամ Պատերազմի եւ խաղաղության ինստիտուտի ազգությամբ ադրբեջանցի լրագրող Իդրակ Աբասովը այցելեց Ջուղայի գերեզմանոց եւ արձանագրեց, որ այն ամբողջությամբ ոչնչացվել է»:
Հայ պատվիրակը կոչ է արել ԵԽԽՎ-ին հավատարիմ լինել իր իսկ ընդունած որոշումներին եւ դիտորդական առաքելություն ուղարկել Ջուղա: «Ադրբեջանի շանտաԺի պատճառով տապալվեց ԵԽԽՎ-ի, ինչպես նաեւ ՅՈՒՆԵՍԿՕ-ի, ԻԿՈՄՈՍ-ի նախապես ծրագրված դիտորդական առաքելությունները Ջուղա: Եւ հիմա, այս ամբիոնից ես կրկին ուզում եմ բարձրացնել Ջուղա ԵԽԽՎ դիտորդական առաքելություն ուղարկելու հարցը: Որպեսզի ԵԽԽՎ իմ գործընկերները տեսնեն, թե ի՞նչ են արել մի ողջ ժողովրդի մշակութային հրաշալի ժառանգության հետ, ինչպե՞ս են վայրագորեն փոշիացրել համաշխարհային կոթողներ հանդիսացող հայկական խաչքարերը:
Մենք պարտավոր ենք դա անել, մենք պարտավոր ենք գնահատական տալ մերօրյա վանդալներին, որովհետեւ ցեղասպանությունը լինում է նաեւ մշակութային»,-ավելացրել է պատգամավորը: Նաիրա Զոհրաբյանը երեկ ԵԽԽՎ պատգամավորներին է բաժանել «Ջուղա. 21-րդ դարի վանդալները» վավերագրական ֆիլիմի DVD տարբերակը:
Նաիրա Զոհրաբյանը երեկ անդրադարձել է նաեւ Սուրբ Ախթամար եկեղեցու խնդրին, ասելով. «Երբ Թուրքիայի իշխանությունը, իր համար դեմոկրատական իմիջ ստեղծելու համար, վերականգնում է Ախթամարի Սուրբ Խաչ վանքը, սակայն արգելում է Վանքի վրա խաչ տեղադրել, ի՞նչ է սա, եթե ոչ ընդամենն իմիտացիա: Իսկ իրականում` կրոնական անհանդուրժողականության վառ օրինակ»:
Երեկ ԵԽԽՎ-ի ամբիոնից ԵԽԽՎ-ում ՀՀ պատվիրակության անդամ Նաիրա Զոհրաբյանը խոսել է վերջին շրջանում Ադրբեջանի կոմից պարբերաբար հնչող սպառնալիքների մասին, թե Ադրբեջանը կռմբակոծի դեպի Լեռնային Ղարաբաղ թռչող քաղաքացիական ինքնաթիռիները: «Ես ուզում եմ ԵԽ ուշադրությունը հրավիրել այսօրինակ հայտարարությաննների որոնք ուղղակիորեն պետական ահաբեկչության սպառնալիք են: Եւ ես ակնկալում եմ, որ ԵԽԽՎ-ն այդ սպառնալիքներին հստակ արձագանք տա»,- ասել է նա:
