Վարորդական իրավունքի վկայական ստանալու գործընթացում կառավարությունը մտադիր է բացառել կաշառակերությունը: Այդ մասին այսօր` ապրիլի 13-ին, լրագրողների հետ զրույցում ասել է վարչապետ Տիգրան Սարգսյանը:
Նրա խոսքով` այդ կապակցությամբ կառավարությունը մտադիր է ձեռնարկել մի շարք միջոցառումներ: Առաջին հերթին կվերացվի վարորդի հոգեկան վիճակի մասին տեղեկանք (հանրությանը հայտնի «փսիխո»-ն) ներկայացնելու անհրաժեշտությունը, քանի որ հոգեկան հիվանդների եւ թմրամոլների մասին տվյալները Առողջապահության նախարարությունը նախապես պետք է տրամադրի Ոստիկանությանը: Այսպիսով, քաղաքացիները պարտավոր չեն լինի լրացուցիչ գումար վճարել այդ տեղեկանքն ստանալու համար:
Բացի այդ, վարորդական իրավունք ստանալու համար հատուկ դպրոցներում վարորդական դասընթացներ անցնելու անհրաժեշտություն չի լինի: «Վերջ ի վերջո, ես պահանջեցի ոստիկանությունից պարզապես արմատախիլ անել կաշառքն այդ գործընթացում»,- նշել է վարչապետը: