Հայոց ցեղասպանության թանգարան-ինստիտուտը ապրիլի 20-21-ը կազմակերպում է «Հայոց ցեղասպանությունը եւ սկանդինավյան արձագանքը» թեմայով միջազգային գիտաժողով` նվիրված Ֆրիտյոֆ Նանսենի ծննդյան 150-րդ ամյակին:
Ինչպես NEWS.am-ին հայտնեցին Հայոց ցեղասպանության թանգարան-ինստիտուտի մամուլի ծառայությունից, գիտաժողովի ընթացքում զեկույցներով հանդես կգան պատմաբան-հետազոտողներ` Հայաստանից, Շվեդիայից, Դանիայից, Նորվեգիայից:
Միջազգային այս գիտաժողովի անցկացումը նպատակ ունի վերականգնելու Սկանդինավիա-Հայաստան հարաբերությունների պատմության այս կարեւոր, սակայն մոռացված ու անտեսված առանցքային դրվագները` քննարկելով դրանք ընդհանուր պատմության ու հիշողության համատեքստում:
Սկանդինավյան միսիոներների ջանքերը, հիմնականում, ուղղված էին Օսմանյան կայսրության տարածքում կոտորածներից տուժած հայ բնակչությանն օգնելուն եւ նրանց շրջանում կրոնական քարոզչություն իրականացնելուն, որոնք, մեծամասամբ, իրականացվում էին դանիական, նորվեգական եւ շվեդական «Կանանց առաքելության աշխատողներ» (K.M.A.) կազմակերպության միջոցով:
Հայոց ցեղասպանությունը միջազգային մեծ արձագանք ունեցավ` գրավելով նաեւ համաշխարհային մամուլի ու հանրության ուշադրությունը: Բացառություն չկազմեցին նաեւ սկանդինավյան երկրները: Շվեդիայի, Նորվեգիայի, Դանիայի կառավարությունները, հասարակական կազմակերպությունները եւ անհատ քաղաքացիները տարբեր կերպ արձագանքեցին Հայաստանում տեղի ունեցող կոտորածներին: 20-րդ դարի սկզբներին նշանավոր սկանդինավցի կին-միսիոներներ Մարիա Յակոբսենը, Ալմա Յոհանսոնը, Կարեն Եփփեն, Բոդիլ Կատարինե Բյորնը եւ ուրիշներ, ստանձնելով իրենց դժվարին առաքելությունը, անգնահատելի օգնություն ցուցաբերեցին բազմաթիվ կարիքավոր հայերի, փրկելով հազարավոր կյանքեր ու ճակատագրեր:
Մեծ Եղեռնի հետեւանքների վերացմանն ուղղված նախաձեռնությունների շարքում մեծ էր նորվեգացի բեւեռախույզ, գիտնական եւ դիվանագետ Ֆրիտյոֆ Նանսենի ջանքերը: Ֆ. Նանսենը, հանդիսանալով Ազգերի լիգայի փախստականների հարցերով գերագույն հանձնակատարը, արդյունավետ քայլեր ձեռնարկեց ցեղասպանությունից հետո անօթեւան մնացած հայերին հայրենիք վերադարձնելու եւ քաղաքացիություն տալու գործում: