Հյուսիս-Հարավ ավտոմայրուղու շինարարական աշխատանքները կմեկնարկեն այս տարվա սեպտեմբեր-հոկտեմբեր ամիսներին: Այս մասին լրագրողների հետ հանդիպման ժամանակ ապրիլի 23-ին հայտարարեց Ազգային անվտանգության խորհրդի քարտուղար Արթուր Բաղդասարյանը` անդրադառնալով Ազգային անվտանգության խորհրդի` երեկ` ապրիլի 22-ին տեղի ունեցած նիստում քննարկված հարցերին:
Նա նշեց, որ ավտոմայրուղու ընդհանուր երկարությունը կազմելու է 540 կիլոմետր, որը ձգվելու է Մեղրիից մինչեւ Բավրա: Բաղդասարյանի խոսքով` սա աննախադեպ ենթակառուցվածքային ծրագիր է, եւ ունի տարածաշրջանային նշանակություն: Այն կապելու է Հայաստանը, Վրաստանն ու Իրանը:
ԱԱԽ քարտուղարը հավաստիացրեց, որ Վրաստանը նույնպես իր տարածքում սկսում է լայնածավալ ծրագիր եւ Հյուսիս-Հարավ ավտոմայրուղու կառուցման արդյունքում շուրջ 190 կիլոմետրով կկրճատվի Երեւան-Բաթում ուղիղ ավտոճանապարհը: Այն այսօր կազմում է 640 կիլոմետր:
«Այս ծրագրի իրականացումը հնարավորություն կտա վրացական հատվածով կառուցվելիք ճանապարհը անցկացնել նաեւ Ախալցխայի տարածքով, որտեղ ամբողջությամբ մեր հայկական գյուղերն են նաեւ: Այս ծրագիրը ոչ միայն քաղաքական, այլ նաեւ սոցիալ-տնտեսական կարեւոր նշանակություն ունի»,- նկատեց Բաղդասարյանը:
Նա նաեւ ընդգծեց, որ ճանապարհը կառուցվելու է ոչ թե ասֆալտապատման միջոցով, այլ բետոնային հիմքով ասֆալտապատման, որի երկարակեցությունը մոտ երկու անգամ ավել է` գնահատվում է 25-30 տարի: «Եթե բետոնային հիմքով ասֆալտապատում լինի, սա նշանակում է շինարարության ծավալների կտրուկ աճ, երկաթ-բետոնե արտադրանթ թողարկող գործարանների աշխատում: Այս խոշոր ծրագրում նման մեխանիզմների կիրառումը կնպաստի տեղական արտադրանքի զարգացմանը»,- նկատեց ԱԱԽ քարտուղարը:
Նշենք, որ ծրագիրն իրականացվելու միջազգային մրցույթի միջոցով, որին մասնակցելու են եվրոպական հեղինակավոր շինարարարկան կազմակերպություններ: