Ապրիլի վերջին Երեւանի քաղաքապետարանը գեղարվեստի խորհրդի նիստում կքննարկի Չեռնոբիլի աղետից մահացած հայերի հիշատակին նվիրված հուշակոթողի տեղադրման հարցը: Այսօր` ապրիլի 26-ին, այս մասին NEWS.am-ի թղթակցի հետ զրույցում ասաց նախագծի հեղինակ, գլխավոր ճարտարապետ Խաչատուր Ղլիջյանը:
Դեռեւս դեկտեմբերից «Չեռնոբիլ ասոցիացիան» համապատասխան նյութեր է ներկայացրել Երեւանի քաղաքապետարանին Մալաթիա-Սեբաստիա համայնքում` Անդրանիկի արձանի մոտակայքում, տեղ հատկացնել աղետից մահացած հայերի հիշատակին նվիրված հուշակոթող տեղադրելու համար:
Խաչատուր Ղլիջյանը նշեց, որ հուշակոթող տեղադրելու մասին քաղաքապետարանը պետք է տեղեկացներ դեռեւս նախորդ շաբաթ, բայց ուրբաթ օրը գեղարվեստի խորհրդի նիստ տեղի չի ունեցել, որտեղ էլ պետք է քննարկվեր այս հարցը: Նախագծի հեղինակը հույս ունի, որ քաղաքապետարանը թույլ կտա հուշակոթող տեղադրել այդտեղ: Այդ հուշակոթողը, ըստ Ղլիջյանի, նվիրված կլինի ռադիացիոն աղետների եւ վթարների զոհերի հիշատակին:
Նշենք, որ այսօր լրանում է Չեռնոբիլի աղետի 25-ամյակը: Հազարավոր մասնագետներ ամբողջ ԽՍՀՄ-ից մասնակցեցին Չեռնոբիլի ատոմակայանի վթարի հետեւանքների վերացմանը: Ապրիլի 26-ը ՄԱԿ-ի կողմից ճանաչվել է ռադիացիոն աղետների եւ վթարների զոհերի հիշատակի միջազգային օր, իսկ ԱՊՀ գործադիր կոմիտեն առաջարկել է կազմակերպել Չեռնոբիլի ԱԷԿ-ի աղետի 25-ամյակի միջոցառումներ:
Հիշեցնենք, որ Չեռնոբիլի ատոմակայանի 4-րդ էներգաբլոկում վթարը տեղի է ունեցել 1986 թվականի ապրիլի 26-ին: Ներկայումս այդ ատոմակայանում բոլոր ռեակտորների աշխատանքը կասեցված է: Այդուհանդերձ 3,5 հազար մարդ առաջվա նման աշխատում են այդ ատոմակայանում: Միջուկային վառելիքը չի բեռնաթափված ռեակտորներից եւ իրավիճակը պետք է վերահսկողության տակ պահել: