Երեւանի Լենինգրադյան փողոցում այսօր`ապրիլի 26-ին, 19:30-ի սահմաններում տեղի է ունեցել ավտովթար` BMW-X5-ը բախվել է էլեկտրասյանը:

Ինչպես NEWS.am-ին հայտնում է ֆոտոլրագրող Գագիկ Շամշյանը, BMW X5 մակնիշի 22 OU 130 համարանիշի ավտոմեքենայի վարորդը, ըստ նախնական տեղեկությունների, չկարողանալով կառավարել մեքենան, բախվել է նշված փողոցի թիվ 90 էլեկտրասյանը: Բախման հետեւանքով վարորդն ու մեքենայում գտնվող երկու ուղեւորները տեղափոխվել են «Արմենիա» բ/կ: Նրանց մեջ է նաեւ 3 տարեկան մի երեխա:

Պարզվել է, որ BMW-X5-ի վարորդը 32-ամյա Գեւորգ Ասլանյանն է, ով աշխատում է «Ասրի թրեյդինգ» ՍՊԸ-ում որպես մենեջեր: Մեքենայի ուղեւորներն են Գ. Ասլանյանի 4 տարեկան որդին` Ռուբեն Ասլանյանն ու 25-ամյա Սարգիս Քոչարյանը, ով աշխատում է «Օրանժ ֆիտնես» ՍՊԸ-ում որպես մարզիչ:

Դեպքի վայրում քննչական աշխատանքները ղեկավարել է ոստիկանության քննչական գլխավոր վարչության Երեւանի քննչական վարչության ճանապարհատրանսպորտային հանցագործությունների քննության բաժնի քննիչ Դավիթ Մարտիրոսյանը: Այս պահին նրա ցուցումով վթարի վայր է կանչվել քարշակ մեքենան, որպեսզի վթարի ենթարկված մեքենան տեղափոխվի տուգանային հրապարակ:

Լուսանկարները եւ տեսանյութը՝ Գագիկ Շամշյանի