Ադրբեջանը հասկացել է մի բան, որ իր տարածքային ամբողջականության ճանաչման հարցով միջազգային հանրությանը դիմելը դատարկ գործ է: Այս մասին լրագրողների հետ հանդիպման ժամանակ հայտարարեց «Սոցիոմետր» սոցիոլոգիական կենտրոնի ղեկավար Ահարոն Ադիբեկյանը` անդրադառնալով ղարաբաղյան խնդրում նկատվող փոփոխություններին:
Նա նշեց, որ գերտերությունները, ի դեմս ԵԱՀԿ Մինսկի խմբի, երբեք միանշանակ չեն լուծի ԼՂ խնդիրը: «Այժմ նրանք նայում են դեպի հյուսիս` Ռուսաստան, ակնկալելով, որ ՌԴ նախագահ Մեդվեդեւը, հաշի առնելով Ադրբեջանի ստրատեգիական նշանակությունը, ստիպի Հայաստանին զիջել տարածքներն եւ զորքերը հանել հայկական կողմից վերահսկվող տարածքներից: Բոլոր դեպքերում, Ռուսաստանի թե’ երկրորդ, թե’ երրորդ նախագահները պնդում են, որ կողմերը լուծում գտնեն ու ցանկացած լուծումի երաշխավոր կդառնան»,-նկատեց սոցիոլոգը:
Նրա խոսքով` քանի որ Ադրբեջանի եւ Հայաստանի պատկերացումները հակադիր են, ԼՂ խնդիրը լուծում չունի: Սակայն, ըստ Ադիբեկյանի, եթե Ադրբեջանը կողմ է Ղարաբաղի ինքնավարությանը, ապա թող վերականգնի այդ ինքնավարությունը, տա Նախիջեւանին հանրապետական ստատուսը: «Եթե դու ինքնավարություն ես տալիս, ապա հիմա տուր: Ասա` Ղարաբա’ղ ջան, սա քո տունն է, արի այստեղ ապրիր: Եթե Բաքու, դու դրա մասին հայտարարում ես ու չես անում, ուրեմն դու խորամանկում ես, ուրեմն քո հայտարարությունները կեղծիք են»,-նկատեց Ադիբեկյանը:
Նա նշեց, որ եթե Հայաստանը պատրաստ է քննարկել ազատագրված որոշ տարածքների զիջումը, ապա ինչո՞ւ թույլ չենք տալիս, որ այդ տարածքների նախկին բնակիչները վերադառնան ու գոնե իրենց գերեզմաններին հետեւեն, մշակեն իրենց հողերն ու հարկ վճարեն Ղարաբաղի կառավարությանը: «Այսինքն, եթե մենք գնում ենք Ղարաբաղի հարցի լուծմանը, ապա մենք պետք է ինքնուրույնաբար մեր ճանապարհը հարթենք եւ թույլ չտանք, որ որեւէ մեկը մեզ ստիպի դա անել: Եւ այդ դեպքում հարցը դուրս կգա փակուղուց»,-ասաց նա:
Նա նաեւ հայտարարեց, թե Բաքվի օդանավակայանում պետք է մեծ տառերով գրել` «Հոգեբուժական կլինիկա», գրել ախտորոշումը`« Бред величия, мания преследованиия»: Սոցիոլոգն այս առաջարկը հիմնավորեց նրանով, որ Ադրբեջանը Հայաստանի պատմական հողերը համարում է ադրբեջանական եւ բացի այդ Հայաստանին մեղադրում է ադրբեջանական մշակույթը սեփականաշնորհելու մեջ: