Հայաստանում ընթացող բարեփոխումները տեսանելի հեռանկարում շոշափելի են լինելու: Այս մասին այսօր` ապրիլի 29-ին հայտարարել է Հայաստանի վարչապետ Տիգրան Սարգսյանը` Եվրոպական եւ եվրասիական հարցերով ԱՄՆ փոխպետքարտուղարի տեղակալ Թինա Քեյդենաուի հետ հանդիպման ժամանակ:
Վարչապետի խոսքով, այդ բարեփոխումների մի մասն իրականացվել են ԵՄ-ի եւ ԱՄՆ-ի տեխնիկական օժանդակության շնորհիվ: Դրանք վերաբերում են ժողովրդավարության, մարդու իրավունքների եւ դատական համակարգի խնդիրներին: Այդ համատեքստում վարչապետ Սարգսյանն անդրադարձել է պետական եւ հանրային ոլորտներում ՀՀ կառավարության կողմից իրականացվող ծրագրերին, որոնց նպատակը քաղաքացիներին մատուցվող ծառայությունների որակի բարելավումն ու պետական կառավարման համակարգի արդյունավետության բարձրացումն է, մասնավորապես, կոռուպցիոն ռիսկերի նվազեցումը:
Խոսելով Հայաստանի տնտեսական զարգացման հեռանկարների մասին` վարչապետը կարեւոր է համարել տնտեսության դիվերսիֆիկացումն ու այն հանգամանքը, որ վերջին շրջանում լուրջ աշխատանք է տարվում տեղեկատվական տեխնոլոգիաների, գյուղատնտեսական արտադրանքի վերամշակման, զբոսաշրջության ոլորտներում:
Թինա Քեյդենաուն ողջունել է կառավարության ղեկավարի մոտեցումները եւ գործադիրի ջանքերը բարեփոխումների իրականացման ուղղությամբ եւ նշել, որ դրանք լիակատար աջակցություն կստանան:
