Թուրքիայի Անթաքիա քաղաքում հայ լրագրողներն այցելել են Թուրքիայի մի շարք հայտնի գործիչների եւ մտավորականների կողմից 2012-ին Խաղաղության Նոբելյան մրցանակի թեկնածու առաջադրված Անթաքիայի քաղաքակրթությունների երգչախմբի փորձերին, որի ընթացքում, երգչախումբն, ի պատիվ հայ հյուրերի, կատարել է հայկական ժողովրդական երգերի շարան:
Ինչպես տեղեկացնում է NEWS.am-ի թղթակիցն Անթաքիայից, երգչախմբի ղեկավար Յըլմազ Օզֆըրաթը նշել է, որ իրենց համար անսպասելի եւ գեղեցիկ անակնկալ էր հայ լրագրողների այցը: Յըլամազ Օզֆըրաթը նախ ողջունել է հյուրերին՝ ներկայացնելով իրենց երգչախմբի նպատակն ու գործունությունը:
«Մեր երգչախմբում կան քրիստոնյաներ, շիա եւ սուննի մահմեդականներ, հրեաներ, հայեր: Մենք այստեղ ենք հավաքվել աշխարհի խաղաղության համար: Երգչախմբի անդամներն ունեն տարբեր տարիք եւ տարբեր մասնագիտություններ: Մենք շատ վայրերում ենք համերգներով հանդես եկել, սակայն մեզ համար ամենակարեւորը՝ խնդիրներ ունեցող վայրերում համերգ տալն է, ցույց տալ այս գեղեցկությունը եւ օգնել հաղթահարելու խնդիրները»,-նշել է երգչախմբի ղեկավարը:
Նա շեշտել է, որ Հայաստանի եւ Թուրքիայի միջեւ քաղաքական տարաձայնությունների վերացումից հետո հայ-թուրքական սահմանի բացումն իրենք են ուզում իրականացնել՝ հայ երաժիշտների հետ համատեղ համերգ տալով: «Սա սրտանց ենք ցանկանում: Երաժշտության մեջ կեղծիք չի լինում, ինչ զգում ես, այն էլ մատուցում ես»,-ասել է երգչախմբի ղեկավարը:
Այնուհետեւ երգչախմբի փորձին այցելած հայ լրագրողների պատվին կատարվել է հայկական երգերի շարան:
Նշենք, որ 2007-ին Անթաքիայում ստեղծված հիշյալ երգչախումբն ունի մոտ 120 անդամ: Խմբի արտասահմանյան ուղեւորություններին մշտապես աջակցում է Թուրքիայի վարչապետ Ռեջեփ Թայիփ Էրդողանը՝ երգչախմբի համար տրամադրելով հատուկ օդանավեր:
NEWS.am-ն ավելի վաղ տեղեկացրել էր, որ մի առիթով երգչախմբի ղեկավարը պատմել է, որ Բելգիայում ԵՄ խորհրդարանականների համար տված համերգից հետո Թուրքիայի վարչապետը դիմել է եվրոպացի պատգամավորներին. « «Մենք տարբեր կրոնների ներկայացուցիչներով երգչախումբ ունենք։ Նրանք եղբոր պես ուս-ուսի տված երգում են։ Դուք ի՞նչ ունեք»:
