Ներկայումս պետությունն ակտիվորեն զբաղվում է հակակարկտային կայանների տեղադրմամբ, սակայն որպեսզի դրանք առավել արդյունավետ աշխատեն անհրաժեշտ է, որ դրանք կապված լինեն միմյանց հետ: Այդ մասին այսօր` մայիսի 11-ին, լրագրողների հետ հանդիպման ժամանակ հայտնել է Հայաստանի վարչապետ Տիգրան Սարգսյանը:
Վարչապետն ընդգծել է, որ այդ նպատակով Հայաստանի տարածքում անհրաժեշտ է տեղադրել ռադիոտեղորոշիչ սարքեր, որոնք կմիացնեն կայանները եւ կքշեն ամպերն անհրաժեշտ ուղղությամբ: Նա նաեւ նշել է, որ պետությունը միշտ փոխհատուցում է կարկտի հասցրած վնասները, եւ հավաստիացրել, որ անցած տարվա համեմատ, այս տարի եղանակային պայմաններն առավել բարենպաստ են:
«Այսպիսով, այս տարվա համար կարելի է կանխատեսել ավելի լավ բերքատվություն»,- նշել է վարչապետը: Նա նաեւ տեղեկացրել է, որ առաջիկայում գյուղատնտեսության ոլորտի վարկավորմանը բանկերը կհատկացնեն 7-8 մլրդ դրամ:
