Թուրքիայում շարունակվում է հայերի նկատմամբ թշնամություն սերմանող քաղաքականությունը կրթական կենտրոններում: Այս անգամ թուրք գիտակից հասարակությանը զարմացրել է Դիջլեյի համալսարանի պատմության բաժինը:
Թուրքական DIHA գործակալության փոխանցմամբ՝ Դիջլեյի համալսարանի պատմության բաժնի ուսանողներին գարնանային քննաշրջանում ռասիստական հարցեր են ուղղել, որը դժգոհություն է առաջացրել ուսանողների մեծ մասի շրջանում:
Հարցերից մեկը հայերի նկատմամաբ բացահայտ թշնամություն եւ ատելություն սերմանող տեքստ է պարունակել: Հարցի տեքստում հայերի նկատմամբ օգտագործվել է «դավաճան», «թշնամու հետ համագործակցող», «թիկունքից հարվածող» արտահայտություններ:
«Հարցում» հաստատական ձեւով նշվել է, թե Օսմանյան Թուրքիայում ցեղասպանություն չի եղել, որ հայերը մահացել են հիվանդություններից, երբ տեղափոխվել են «անվտանգ» վայրեր, իսկ նրանց թիվը պակասել է, քանի որ նրանք իրենց ցանկությամբ հեռացել են Թուրքիայից: «Հարցի» վերջում ուսանողին առաջարկվում է «ճիշտ է» եւ «սխալ է» տարբերակները:
Զայրացած ուսանողների մի մասը պնդել է, որ իրենք համաձայն չեն եղել հարցի հետ, սակայն նշել են «ճիշտ է» տարբերակը, որպեսզի չկտրվեն քննությունից: «Մենք գիտենք, որ պատմությունը այդպես չի եղել: Այդ ռասիստական հարցերը ուղղորդված են»,-նշել են վրդովված ուսանողները:
DIHA-ի հետ զրույցում Ստամբուլի «Ակոս» շաբաթաթերթի խմբագիր Ռոբեր Քոփթաշը շեշտել է, թե նման ռասիստական հասկացություններն իրենց համար զարմանալի չեն թվում: «Թուրքիայում ժողովուրդների հանդեպ թշնամություն եւ ատելություն սերմանող այսպիսի գաղափարախոսության հետեւանքով փողոցներում շատ են քրիստոնյաներին, հայերին եւ քրդերին սպանել ցանկացողները»,-նշել է հայազգի խմբագիրը: