Ադրբեջանական կողմը «դիպուկահարների պատերազմի» դրդապատճառ ունի, դա շանտաժի եւ հայկական կողմից վրա ճնշում բանեցնելու որոշակի մակարդակն է: Այդ մասին հայտարարել է Կովկասի ինստիտուտի տնօրեն Ալեքսանդր Իսկանդարյանը Երեւանում ընթացող «Կովկաս-2010» խորհրդաժողովում:
«Ամեն ինչ ընթանում է ծրագրով, Բաքվի հրամանով: Դրանք լեյտենանտ Մամեդովի կամ ենթասպա Հովհաննիսյանի գործողությունները չեն, այլ ավելի լուրջ է»,- նկատել է Իսկանդարյանը` հավելելով, որ իրերի նման դրության պայմաններում կանխատեսում է «դիպուկահարների պատերազմի» շարունակում:
Ըստ Իսկանդարյանի, կարելի է նկատել այդ ամենը կանխելու` հայկական կողմի վճռականությունը: Փորձագետը նկատել է, որ ընդհանուր առմամբ, ղարաբաղյան հակամարտության շուրջ փոփոխություններ չկան:
Իսկանդարյանը նաեւ հայկական կողմի մոտ հռետորաբանության կոշտացում է նկատել, եթե նախկինում «ոչ մի թիզ հող» արտահայտությունը մի արմատական տրամադրված անձինք էին անում, ապա այժմ անգամ երկրի նախագահն է գրեթե նման բան ասում: