Խոշոր բիզնեսի ցուցանիշները 2010թ. հատկապես հուսադրող են, խորհրդարանում հայտարարել է պետեկամուտների կոմիտեի փոխնախագահ Արմեն Ալավերդյանը:
Նրա խոսքով, 3000 խոշոր հայ ձեռնարկատերերն ապահովել են պետական բյուջեի մուտքերի 80 տոկոսը: 325 առավել խոշորներն ապահովել են բյուջեի մուտքերի 50 տոկոսը, ինչը 15 տոկոսով ավելի է, քան 2009թ.: Հիմնականում, ըստ Ալավերդյանի, այդ ձեռնարկատերերն աշխատում են էներգետիկայի եւ լեռնահանքային արդյունաբերության ոլորտներում:
Նա նշել է, որ լեռնահանքային արդյունաբերությունն ապահովել է հարկային մուտքերի 18 միլիարդը, նախորդ տարվա զրոյական ցուցանիշի դիմաց: Ալավերդյանը նշել է նաեւ, թե պետությունը անում է հնարավորը, որ չբարձրացնի հարկային բեռը:
Էկոնոմիկայի փոխնախարար Կարինե Մինասյանը նկատել է, թե հայկական տնտեսության կառուցվածքն աստիճանաբար փոխվում է: Եթե նախկինում առյուծի բաժինը հասնում էր շինարարությանը, այժմ ավելացել են ծառայությունների եւ լեռնահանքային արդյունաբերության ցուցանիշնեը: Փոխնախարարը խոստացել է վերամշակող արդյունաբերության ակտիվացում: