Ամերիկայի հայկական համագումարը մեկնաբանել է ԱՄՆ նախագահ Բարաք Օբամայի որոշումը` Ջոն Հեֆերնին Հայաստանում դեսպանի պաշտոնում առաջադրելու վերաբերյալ:
Իր հայտարարության մեջ Համագումարը հիշեցնում է, որ 90-ականների կեսերին Հեֆերնն աշխատել է նախկին կոնգրեսական Դագ Բիրեյթրի համար: Վերջինս հայտնի է որպես կոնգրեսի հակահայ անդամ, ակնհայտ համակրանք է ունեցել Թուրքիայի նկատմամբ:
Օրինակ, 1995-96 թվականներին, լինելով միջազգային հարաբերությունների հանձնաժողովի անդամ` Բիրեյթրը քվեարկել է ոչ միայն Հայաստանի, այլեւ աշխարհում մարդու իրավունքների շահերի պաշտպանությանն ուղղված օրինագծերի դեմ:
Բիրեյթրը քվեարկել է նաեւ Թուրքիայի ֆինանսավորման կրճատման դեմ, որն առաջարկվել էր Հայաստանը շրջափակման ենթարկելու համար:
Համագումարը հուսով է, որ իր նշանակումից հետո Հեֆերնը ոչ միայն կհայտարարի Հայոց ցեղասպանությունը ճանաչելու օգտին, այլեւ կանդրադառնա Ադրբեջանի կողմից Լեռնային Ղարաբաղի դեմ սանձազերծած ագրեսիային:
