ԱՄՆ պետքարտուղարության մամուլի քարտուղարի ժամանակավոր պաշտոնակատար Մարկ Թոները տեղյակ չէ Հիլարի Քլինթոնի եւ Հայաստանի ԱԳ նախարար Էդվարդ Նալբանդյանի հանդիպման մանրամասներին, սակայն խոստանում է պարզել:
«Դա ջերմ հանդիպում էր»,- ասել է նա` մեկնաբանելով այն փաստը, որ ԱՄՆ-ում կայացած բանակցություններից հետո կողմերը որեւէ հայտարարություն չեն արել:
«Դա հնարավորություն էր քննարկել երկկողմ եւ տարածաշրջանային խնդիրները, խոսել ղարաբաղյան հակամարտության կարգավորման եւ հայ-թուրքական հաշտեցման վերաբերյալ»,- նշել է Թոները:
Նշենք, որ Հայաստանի ԱԳ նախարար Էդվարդ Նալբանդյանը մայիսի 19-ին Վաշինգտոնում հանդիպում է ունեցել ԱՄՆ պետքարտուղար Հիլարի Քլինթոնի հետ:
ԱԳՆ մամուլի ծառայությունից NEWS.am-ին հայտնել են, որ Քլինթոնը նշել է, որ Միացյալ Նահանգներն ու Հայաստանը կապված են ամուր բարեկամությամբ ու գործընկերությամբ եւ հարաբերությունները գնալով ավելի են ամրապնդվում եւ զարգանում: «Արտգործնախարար Նալբանդյանի հետ բազմաթիվ հանդիպումներ են կայացել եւ ես ուրախ եմ կրկին ողջունել նրան Պետքարտուղարությունում: Միացյալ Նահանգների ու Հայաստանի միջեւ գոյություն ունեն այնպիսի բազմաբնույթ կապեր, որոնք սկսվում են քաղաքականությունից եւ հասնում մինչեւ անձնական հարաբերություններ եւ ավելին, ինչը մեզ համար շատ կարեւոր է»,- ասել է Քլինթոնը:
Քլինթոնը նաեւ ընդգծել է, որ ղարաբաղյան հիմնախնդրի խաղաղ կարգավորումը հնարավոր է բացառապես խաղաղ ճանապարհով, եւ նշել, որ ԱՄՆ-ն, որպես ԵԱՀԿ Մինսկի խմբի համանախագահ, շարունակելու է իր լիակատար աջակցությունը հակամարտության կողմերի միջեւ համաձայնությունների ձեռք բերմանը եւ հիմնախնդրի հանգուցալուծմանը:
