Քննչական մարմինը դեռ անհրաժեշտ չի համարում հարցաքննել Հայաստանի նախկին նախագահներին 2008թ. մարտի 1-ի իրադարձությունների կապակցությամբ հարուցված գործի շրջանակներում: Այդ մասին հայտարարել է Հատուկ քննչական ծառայության քննչական խմբի ղեկավար Վահագն Հարությունյանը այսօր` մայիսի 25-ին կայացած մամուլի ասուլիսում:
Պատասխանելով Լեւոն Տեր-Պետրոսյանի եւ Ռոբերտ Քոչարյանի հնարավոր հարցաքննության մասին հարցին` Հարությունյանը նկատել է, որ այդ մասին խոսվում է 2008թ. մարտից: Նշելով, որ քննության ընթացքում, ելնելով անհրաժեշտությունից, կարող են հարցաքննվել կոնկրետ անձինք, այդ թվում նաեւ նախագահները, Հարությունյանն ասել է, թե դեռ նման հարց դրված չէ, սակայն եթե նախագահների հարցաքննությունն անհրաժեշտ լինի, նրանք կհարցաքննվեն:
Վահագն Հարությունյանը հայտարարել է, թե որեւէ ռասայական, գենդերային, քաղաքական խտրականություն քննությունը չի դնում:
Նշենք, որ 2008թ. մարտի 1-2-ին խաղաղ ցուցարարների նկատմամբ ոստիկանության կիրառած բռնությունների արդյունքում սպանվել էր 10 մարդ, վիրավորվել հարյուրավորները:
