Վրաստանը, ինչպես եւ Հայաստանն իրավունք ունեն ազգային եւ քաղաքական անվտանգության նկատառումներով իրենց տարածք թույլ չտալ այս կամ այն անձի մուտքը եւ չբացատրել պատճառը: Այդ մասին հայտարարել է Հայաստանում Վրաստանի դեսպան Թենգիզ Շարմանիշվիլին` պատասխանելով հարցին, թե ինչու են ՀՀ խորհրդարանի պատգամավոր Շիրակ Թորոսյանին պերսոնա-նոն-գրատա հայտարարել Վրաստանում:
«Եթե դուք ծանոթանաք հրապարակումների հետ, որոնք որեւէ ընդհանուր բան չունեն խոսքի ազատության հետ, բայց սրում են իրավիճակը, հասկանալի կլինի թե ինչու է նման որոշում կայացվել»,- նկատել է դեսպանը` ընդգծելով, որ Թորոսյանը սրում է իրավիճակը երկու ժողովուրդների միջեւ: «Թորոսյանի երբեմն անհավասարակշիռ հայտարարությունների գերազգայնականությունը թույլ չի տալիս նրան Վրաստանում ցանկալի հյուր համարել»,- հայտարարել է Թենգիզ Շարմանիշվիլին:
Պատասխանելով Վահագն Չախալյանի մասին հարցին, դեսպանը նկատել է, որ նա կամ կկրի իր պատիժը, կամ Վրաստանի նախագահի կողմից ներման կարժանանա: Ներումն էլ երկրի նախագահի ինքնիշխան իրավունքն է. եւ դեսպանի համար կոռեկտ չէ մեկնաբանել դրա հնարավորությունը: