Թուրքիայի «Ազգայնական շարժում» (MHP) կուսակցության առաջնորդ Դեւլեթ Բահչելիի՝ Դիարբեքիրում հունիս 6-ի նախընտրական հանրահավաքի ժամանակ սադրանքներ կազմակերպելու մեղադրանքով ձերբակալվել է ծայրահեղ ազգայնականների շրջանում հեղինակություն Յուսուֆ Զիյա Արփաջըքը։ Թուրքական Internethaber-ի փոխանցմամբ՝ թուրքական ոստիկանությունը ձերբակալել է 17 հոգու, ովքեր նախապատրաստել են սադրանքներ իրականացնել հունիսի 6-ին Դիարբեքիրում տեղի ունենալիք Դեւլեթ Բահչելիի նախընտրական հանրահավաքի ընթացքում։
Ձերբակալվածների մեջ է նաեւ MHP-ի լեգենդար առաջնորդ Ալփարսլան Թյուրքեշի մտերիմ եւ թիկնապահ Յուսուֆ Զիյա Արփաջըքը։ Վերջինս 1992-ին Ղարաբաղում պատերազմել է հայերի դեմ։ Կան նաեւ լուսանկարներ, որտեղ Արփաջըքը զինվորական հագուստով նկարվել է Ղարաբաղյան պատերազմի ժամանակ։ Արփաջըքը 2003-ին մեկնել է Իրաք պատերազմելու ամերիկյան ուժերի դեմ։
Արփաջըքը 1978-ից անդամակցում է ծայրահեղ ազգայնական «Իդեալիստների շարժում» կազմակերպությանը եւ դատապարտվել 10 տարի ազատազրկման, երկու անգամ փախչել է բանտից։ Նրան անվանում են «Յուսուֆ հոջա», ով ծայրահեղ ազգայնականների մեջ մեծ հեղինակություն է վայելում։
Հայտնի է նաեւ, որ Ազգայնական Շարժում կուսակցության առաջնորդ Ալփարսլան Թյուրքեշը մտադրություն ուներ Բաքվի մոտակայքում ստեղծել «Բոզքուրթ» (գորշ գայլ) անվանվող ճամբար, որտեղ ադրբեջանցի եւ այլ թուրքալեզու ժողովուրդների ներկայացուցիչ պանթուրքիստական հայացքների տեր երիտասարդները զինվորական կրթություն ստանաին։ Շրջանավարտներից սկզբնական շրջանում պետք է կազմվեր «Բոզքուրթ» անվանվող ստորաբաժանումը, որը հետագայում պետք է հանդիսանար այսպես կոչված «Թուրանի բանակի» հիմքը: Ինչպես նշել է իր հուշերում Յուսուֆ Զիյա Արփաջըքը. «ըստ առաջնորդի (Ա. Թյուրքեշի) այդ բանակը պետք է հասներ Երեւանի դարպասներին»: Իրականում 1992 թ. Բաքվի մոտակայքում հիմնվեց «Ռուզգյար» (քամի) անվանվող ճամբարը, որտեղ դիվերսիոն եւ քուրդ զինյալների ջոկատների հետապնդման փորձ ունեցող թուրք ազգայնականները վարժեցնում էին ադրբեջանցի ազգայնականներին, որոնցից ստեղծվեց «Ռուզգյար» ստորաբաժանումը: Այդ ստորաբաժանման փոգնդապետ էր հանդիսանում Յուսուֆ Զիյա Արփաջըքը:
