Հունիսի 4-ին կայանալիք Եվրոպայի առաջնության Ռուսաստան – Հայաստան ընտրական հանդիպումից առաջ Սանկտ Պետերբուրգում Վարդան Մինասյանը մամուլի ասուլիսում հայտարարել է, որ թիմերի երեւանյան հանդիպման համեմատ Հայաստանի հավաքականն այժմ հոգեբանորեն եւ ֆունկցիոնալ ավելի լավ է պատրաստված: Թեեւ ընտրական մրցաշարի հինգ խաղերից չորսը Հայաստանի հավաքականը տանն է անցկացրել, սական Մինասյանի խոսքով, հավաքականը դրսում խաղալու փորձ նույնպես պետք է ձեռք բերի, իսկ ռուսների հետ բարդ կլինեն մեկնարկային րոպեները:
Դարպասապահ Ռոման Բերեզովսկին, պաշտպան Սարգիս Հովսեփյանը եւ հարձակվող Յուրա Մովսիսյանը չնայած բաց թողած խաղերին այժմ լավ վիճակում են եւ պատրաստ են վաղվա խաղին: Մինասյանը նշել է, որ թիմի առջեւ ամեն խաղից առաջ դրվում է հաղթելու խնդիր եւ մրցաշարային աղյուսակին ինքը չի նայում:
Հայաստանի հավաքականի գլխավոր մարզիչն արդեն որոշել է մեկնարկային կազմը եւ հույս ունի, որ մնացած միակ մարզման ընթացքում ոչ ոք վնասվածք չի ստանա:
Թիմն էլ փորձում է միշտ խաղալ նույն տակտիկական դասավորվածությամբ, սակայն թիմը խաղում է այնքան, ինչքան մրցակիցն է հնարավորություն տալիս: Սակայն Ռուսաստանի հավաքականի մարտավարությանը հարմարվելու մտադրություն Հայաստանի հավաքականը չունի, ասել է Մինասյանը: