Երեւանի Էրեբունի վարչական շրջանից աղիքային սուր վարակով Նորքի ինֆեկցիոն հիվանդանոց են տեղափոխվել 26 քաղաքացիներ. թունավորման պատճառը խմելու ջուրն է եղել։ NEWS.am-ի թղթակցի հետ զրույցում այս մասին հայտարարեց հանրապետության գլխավոր համաճարակաբան Արա Ասոյանը։
«Երեկ երեկոյան ժամերին հիվանդանոց ընդունվածներից 20-ը երեխաներ են, 6-ը՝ մեծահասակներ։ Ընդ որում, ամենափոքր երեխան 1 տարեկան է։ Նրանց բոլորի մոտ աղիքային սուր վարակի պատկեր է գրանցվել։ Համոզված եմ, որ ինֆեկցիայի պատճառը ջուրն է, բայց թե մանրէների որ տեսակն է դարձել թունավորման պատճառ, պարզ կդառնա լաբորատոր հետազոտոթյուններից հետո՝ հավանաբար րկուշաբթի»,- տեղեկացրեց Ասոյանը։
Նա նաեւ ընդգծեց, որ հիվանդների առողջական վիճակի մեջ դրական տեղաշարժ կա եւ նրանց կյանքին վտանգ չի սպառնում։
Արա Ասոյանը միաժամանակ հերքեց տարածված շշուկները, թե թունավորման պատճառը վարունգն է: Հիշեցնենք, որ եվրոպական երկրներում արդեն 17 մարդ է մահացել վարունգների թունավորումից, հազարից ավելի մարդիկ վարակվել են: Հայաստանը արգելել է վարունգի ներկրումն Իսպանիայից: