Հայկական զինված ուժերը խստորեն պահպանում են հրադադարի ռեժիմը: Այդ մասին հայտարարել է Հայաստանի պաշտպանության նախարարի մամուլի քարտուղար Դավիթ Կարապետյանը` մեկնաբանելով հրադադարի ռեժիմի խախտումների վերաբերյալ ադրբեջանական լրատվամիջոցների տարածած լուրերը:

«Իրականում ադրբեջանական կողմը ամեն օր ավելացնում է հրադադարի ռեժիմի խախտումները և փորձում դրանք վերագրել հայկական կողմին: Ադրբեջանի նման քաղաքականությունը դատարապարտված է, քանի որ միջազգային հանրությանը դժվար է բացատրել, թե որն է հայկական կողմի շահը` հակամարտության գոտում իրավիճակը սրելու և հրադադարը խախտելու համար:

Կարծում եմ` Ադրբեջանը ամենօրյա նման ապատեղեկատվությամբ փորձում է հող նախապատրաստել ապագա սադրանքների համար: Հայկական զինված ուժերը ի զորու են համարժեքորեն պատասխանել Ադրբեջանի բոլոր սադրանքներին»,- նշել է Կարապետյանը:

Նշենք, որ ընթացիկ տարվա սկզբից Ադրբեջանը մոտ 5 հազար անգամ խախտել է հրադադարի ռեժիմը Հայաստանի եւ Լեռնային Ղարաբաղի Հանրապետությունների զինված ուժերի հետ շփման գծում: Հայաստանի պաշտպանության նախարարության տվյալներով` նշված ժամանակահատվածում ադրբեջանական զինված ուժերը մոտ 900 անգամ կիրառել են СВД, մոտ 100 անգամ` ДШК, 90 անգամ` «սեւ նետ» տեսակի զենք: Բացի այդ, ադրբեջանական կողմը տարվա սկզբից 6 անգամ օգտագործել է РПГ-7 նռնակ եւ երկու անգամ`АГС-17:

Հրադադարի ռեժիմի խախտման արդյունքում տարվա սկզբից սպանվել է 8 զինծառայող, վիրավորվել է 7-ը:

2010թ. Ադրբեջաննը մոտ 7300 անգամ խախտել է հրադադարը, իսկ 2009-ին` գրեթե 4600 անգամ: 2008-ին արձանագրվել է 3500 խախտում, 2007-ին` 1400, իսկ 2006-ին` ընդամենը 600 խախտում: