Գյումրիի որոշ բուհեր կանգնել են լրջագույն խնդրի առաջ. այս տարի դասախոսական կազմի կրճատում, դրույքաչափերի պակասեցում է սպասվում բոլոր բարձրագույն ուսումնական հաստատություններում:
Ճարտարագիտական համալսարանի Գյումրիի մասնաճյուղում անցած ուսումնական տարում արդեն 10 մասնագետ-կադրեր կրճատվել էին, իսկ այս տարի նոր կրճատումներ են սպասվում: Կադրային կրճատումներ է սպասվում նաեւ Մանկավարժական համալսարանի Գյումրիի մասնաճյուղում:
Բանն այն է, որ Հայաստանի կառավարության որոշմամբ, կրճատվել է պետական բյուջեից բուհերին հատկացվող ֆինանսավորումը: Ըստ այդմ, եթե նախորդ տարիներին գումար հատկացվում էր պետպատվերի շրջանակներում սովորող ուսանողների թվի չափով, ապա այս տարի գումարը զգալի նվազել է:
Բուհերն իրենց առջեւ ծառացած խնդիրները լուծելու են սեփական ուժերով: Պետական բյուջեից ֆինանսավորում ստանալու համար Գյումրիի բուհերը պատրաստվում են կառավարությանը ծրագիր ներկայացնել, որը պարտադիր կերպով պետք է լինի կրթական ուղղվածության:
